Namangan viloyatining sobiq hokimi To‘lqin Jabborov vafot etdi. Bu haqda “Daryo” muxbiri Azizbek Abduvaliyev xabar bermoqda.

To‘lqin Jabborov 1996—2004-yillarda Namangan viloyatiga rahbarlik qilgandi. 2000—2005-yillarda Oliy Majlis deputati etib saylangan.

Viloyatda, xususan, qishloq xo‘jaligi, qurilish va obodonlashtirish bilan bog‘liq ko‘plab o‘zgarishlar To‘lqin Jabborov shaxsi bilan bog‘lanadi.

Jumladan, Namangan shahridagi mashhur favvora, “Pahlavon” sport majmuasi, “Kichkintoylar bog‘i”, Bouling markazi, “Jahon” bozori kabi inshootlar qurilishi, viloyat teatri, shahar-tumanlardagi tez tibbiy yordam bo‘limlari kapital taʼmiri, Jiydakapa va Yangiqo‘rg‘on yo‘llarining kengaytirilishi,  zamonaviy tibbiyot uskunalari  va qishloq xo‘jaligi texnikalari keltirilishi ushbu yillarda amalga oshirilgan.

To‘lqin Jabborov bugun, 4-oktabr kuni uzoq davom etgan xastalikdan so‘ng olamdan o‘tdi. U 73 yoshni qarshilagan edi.