Hindiston Kanadadan 10-oktyabrgacha 40 dan ortiq diplomatini chaqirib olishni talab qildi, deb xabar bermoqda Financial Times nashriga masaladan xabardor manbalar. Ulardan birining aytishicha, Nyu-Dehli ushbu sanadan keyin qolganlar uchun diplomatik immunitetni bekor qilish bilan tahdid qilmoqda. Kanada Tashqi ishlar vazirligi va Hindiston hukumati izoh berishdan bosh tortdi.

Gazetaning yozishicha, Kanada rasmiylari Ottavada sikx separatistlari yetakchilaridan biri Hardip Singx Nijarning o‘ldirilishiga aloqador deb hisoblangan hind razvedkasining yuqori martabali zobitini mamlakatdan chiqarib yuborishga qaror qilganidan keyin ikki davlat o‘rtasida inqiroz yuzaga kelgan.

FT manbasining aytishicha, Hindistonda 62 nafar kanadalik diplomat bor, Nyu-Dehli ulardan 41 nafarini qisqartirishini ma’lum qilgan.

FT suhbatdoshlari, shuningdek, Nijarning o‘ldirilishi Kanada bosh vaziri Jastin Tryudo va Hindiston bosh vaziri Narendra Modi o‘rtasida G20 sammitidagi muzokaralarning asosiy mavzularidan biri bo‘lganini aytishdi. O‘shanda Hindiston tomoni Ottavaning voqeani tergov qilishda hamkorlik qilish haqidagi so‘rovini “qat’iy rad etgan”, dedi manbalar.

Kanada Hindistonni siyosiy qotillikda gumon qildi

Hardip Singx Nijar Hindistonda mustaqil sikx davlati — Xalistonni tashkil etish tarafdori edi. Hindiston hukumati uni terrorchi deb hisoblagan. Nijar 18-iyun kuni Kanadaning Vankuver hududi yaqinida joylashgan Sarri shahridagi sikxlar ibodatxonasi yonida o‘ldirib ketilgan.

Tryudo 18-sentyabr kuni parlamentga favqulodda murojaat qildi va unda Kanada huquq-tartibot idoralari Hindiston hukumati agentlari va Nijarning o‘limi o‘rtasidagi potentsial bog‘liqlikka oid “ishonchli da’volarni” qidirayotganini aytdi.

Hindiston TIVning javobi

Hindiston Tashqi ishlar vazirligi mamlakatning Nijar o‘limiga aloqadorligi haqidagi taxminlarni “absurd” deb atadi. TIV tomonidan e’lon qilingan bayonotda, bosh vazir Modi Tryudo bilan suhbatda bu ayblovlarni “butunlay rad etgani” ta’kidlangan.

Hardip Singx Nijar Hindistonda tug‘ilgan, ammo so‘nggi yillarda Kanadada yashagan va shu mamlakat fuqaroligini olgan. 2018-yilda Hindiston rasmiylari Nijarni sikx separatistlari tomonidan sodir etilgan ko‘plab qotilliklarga aloqadorlikda aybladi. U o‘z aybini qat’iyan rad etdi.

Hindiston Kanadaga yuborgan “terrorchilar ro‘yxati”da Nijarning ham ismi kiritilgan.