Toshkent shahrining Sergeli tumanidagi “Quruvchilar” dahasida joylashgan Inter Logistics MCHJga qarashli omborxonada kuchli portlash sodir bo‘ldi. “Daryo” muxbirining hodisa joyidan ma’lum qilishicha, hozirda Yakkasaroy tuman tibbiyot birlashmasi xodimlari jabrlangan aholiga yordam ko‘rsatmoqda.
Mudofaa vaziri matbuot kotibi Otabek Yuldashevga ko‘ra, Sergeli mudofaa ishlar bo‘limida Mudofaa vazirligi shtabi tashkil etilgan.
“Palatkalar yoyilib, aholi uchun tushlik va kechki ovqatlar tayyorlash ishlari amalga oshirilmoqda. Mobil gospital hududga jalb etilgan — u fuqarolarga yordam ko‘rsatadi. Shuningdek, harbiy psixologlar aholiga psixologik yordam ko‘rsatishni boshladi”, — deydi u.
Yuldashevning ta’kidlashicha, hududga Toshkent harbiy okrugi, Qurolli Kuchlar akademiyasi hamda Toifalangan obyektlarni qo‘riqlash qo‘shinlari qo‘mondonligining mingga yaqin harbiy xizmatchilari jalb etilgan bo‘lib, ular talafot yetgan joylarni tozalash bilan shug‘ullanmoqda.
Izoh (0)