“Daryo”da Toshkent shahrining Yashnobod tumanida 9 ta xonadondan iborat uch qavatli uy 39 nafar kishiga pullangani bilan bog‘liq firibgarlik holati ochiqlangandi. Bosh prokuratura axborot xizmatining xabar berishicha, holat yuzasidan prokuratura organlari tomonidan tergovga qadar tekshiruv harakatlari o‘tkazilmoqda.
“Daryo.uz” internet nashrida Yashnobod tumanidagi uy-joy bilan bog‘liq firibgarlik sodir qilingani haqida maqola e’lon qilingan. Mazkur holat yuzasidan Toshkent shahar prokuratura organlari tomonidan tergovga qadar tekshiruv harakatlari o‘tkazilmoqda. Maqolada ko‘rsatilgan holatlar to‘liq, xolisona o‘rganilib, yakuni bo‘yicha qonuniy qaror qabul qilinadi, — deyiladi Bosh prokuratura axborotida.
Ma’lum qilinishicha, tekshirish yakuni bo‘yicha qo‘shimcha ma’lumot beriladi.
Biz firibgarlik qurboni bo‘ldik. Zohmir Group nomli qurilish kompaniyasi tomonidan aldandik. Bu kompaniyaning reklamasiga chuv tushdik. Yangi uylarga investitsiya kiriting, yaxshi uylarga ega bo‘lasiz, deyishganiga ularga ishonib, pullarimizni notarius orqali topshirgandik. Shartnomalar qilindi, kimdir pulini bank orqali to‘ladi, yana kimdir notarius orqali qarz shartnomalari qilib, naqd shaklda to‘lov qildi. Yana boshqa birov qurilish mollariga pul tikib, uyga shu tarzda investitsiya kiritdi, — degandi qurilish tashkilotiga aldanganini aytgan murojaatchilardan biri Avaz Yormuhammedov.
Ma’lum bo‘lishicha, Zohmir Group nomli qurilish kompaniyasi shaharning Yashnobod tumanidagi yangi qurilayotgan 9 ta xonadondan iborat uch qavatli uylarini 39 nafar fuqaroga pullagan.
Qurilish tashkiloti bizga va’da qilgan uylarni 2022-yilning may—iyun oyida topshirishi kerak edi. Lekin 2023-yil keldi hamki, uy qurilishi qanday holatda bo‘lsa, shunday turibdi. Hech narsa o‘zgarmagan. Biz aytilgan muddatdan o‘tgach, quruvchidan uyimiz qani, qachon tayyor bo‘ladi, deb so‘raganimizdan so‘ng, boshqa qiziq-qiziq muammolar paydo bo‘lmoqda. Aniqlanishicha, bizga sotilgan uylar yana 4-5 kishiga sotilgan ekan, degandi “Daryo” jurnalisti bilan suhbatlashgan murojaatchilar.