Nomini X’ga o‘zgartirgan Twitter ijtimoiy tarmog‘i foydalanuvchilarning biometrik ma’lumotlarini yig‘ishga qaror qildi, deb yozmoqda Bloomberg.
“Xavfsizlik, himoya va identifikatsiya maqsadida sizning roziligingiz bilan biometrik ma’lumotlaringizni to‘plashimiz va ulardan foydalanishimiz mumkin”, — deyiladi ijtimoiy tarmoqning yangi maxfiylik siyosatida.
X kompaniyasi o‘z siyosatida biometrik ma’lumotlar aynan nimalardan iborat bo‘lishiga aniqlik kiritmagan, boshqa kompaniyalar bu atamani yuz tasviri, ko‘zning rang pardasi va barmoq izlari uchun ishlatadi.
X maxfiylik siyosatidagi yana bir bandga ko‘ra, ijtimoiy tarmoq foydalanuvchilarning ishi va ta’limi, shuningdek, ularning malakasi haqidagi ma’lumotlarni to‘playdi, bu ularga vakansiya tavsiya qilish va agar foydalanuvchi ish izlayotgan bo‘lsa, potensial ish beruvchilarni xabardor qilish uchun kerak, deyiladi xabarda.
X kompaniyasining vakili maxfiylik siyosati o‘zgartirilganini tasdiqladi, ammo tafsilotlarni keltirmadi.
Mask Twitter’ni “super app”ga aylantirmoqchi
Twitter’ni sotib olib, uning nomini X’ga o‘zgartirgandan so‘ng, milliarder Ilon Mask ijtimoiy tarmoqni “super app”ga aylantiradigan o‘zgarishlarni e’lon qildi, bunda dastur ko‘plab funksiyalarni o‘z ichiga oladi – to‘lovlardan tortib foydalanuvchilar o‘rtasidagi qo‘ng‘iroqlargacha.
31-avgust kuni ijtimoiy tarmoqning maxfiylik siyosatiga o‘zgartirishlar kiritilgani haqidagi xabarlar fonida Mask X foydalanuvchilari tez orada telefon raqamidan foydalanmasdan audio va video qo‘ng‘iroqlarni amalga oshirishi mumkinligini ma’lum qildi. Qo‘ng‘iroqlar iOS, Android qurilmalari, shuningdek, Mac va shaxsiy kompyuterlar uchun ochiq bo‘ladi.
Avgust oyi oxirida X kriptovalyutalar bilan ishlash uchun ham litsenziya oldi. Bu bilan kompaniya kelajakda dasturga foydalanuvchilarga kriptovalyutalarni bir-biriga o‘tkazish imkonini beruvchi funksiyani qo‘shishi mumkin.
