Texas shtatida yashovchi Peggi Jons bir vaqtning o‘zida ham qirg‘iy, ham ilon hujumiga uchrab, jarohat oldi. 64 yoshli ayol o‘z hovlisida maysa o‘rayotganida ustiga ilon kelib tushgan, deb xabar bermoqda BBC.
Qayd etilishicha, voqea 25-iyul kuni Texasning Luiziana bilan chegarasi yaqinida joylashgan Silsbi shahrida sodir bo‘lgan.
Ilonni ayolning uyi ustidan uchib o‘tayotgan qirg‘iy tashlab yuborgan va shu zahoti o‘ljasini yana olib ketish uchun pastga sho‘ng‘igan.
Ilon esa ayolning qo‘liga o‘ralib qolgan va uning yuziga hujum qila boshlagan, bu vaqtda qirg‘iy uning badaniga tirnoqlarini botirgan.
“Men ilonni uloqtirmoqchi bo‘ldim, lekin u qo‘limga o‘ralib olgandi. Ilon yuzimga hamla qildi, ko‘zoynagimga bir-ikki marta urildi”, — dedi Jons jurnalistlarga.
Qirg‘iy ilonni Peggi Jonsning qo‘lidan darhol ajratib ololmagach, tirnoqlarini bir necha bor ayolning qo‘liga botirgan.
Kurash qirg‘iyning g‘alabasi bilan yakunlangan va u o‘z o‘ljasini olib uchib ketgan, shundan keyin Peggi Jonsning hayratdan qotib qolgan turmush o‘rtog‘i rafiqasini shifoxonaga olib ketgan.
Ayolning terisi teshilgan, kesilgan, tirnalgan va qattiq ko‘kargan. Bundan tashqari, hujum paytida ilon uning ko‘zoynagini sindirib yuborgan.
Ayol CBS News uchun intervyusida Texasda yovvoyi jonivorlar bilan sodir bo‘ladigan hodisalar kamyob emasligini aytdi.
“Avval ham qirg‘iy ilonni avval yerga tashlab, keyin ko‘tarib olganini ko‘rganman. Ular bu orqali o‘ljasini o‘ldirmoqchi bo‘ladi”, — deydi Jons.
Izoh (0)