Ushbu haftaning katta qismida O‘zbekiston hududi bo‘yicha ob-havo yuqori barik o‘rkach rivojlanishi va Eron hududlaridan issiq havo kirib kelishi bilan belgilanadi, deb xabar bermoqda “O‘zgidromet”.
Havo harorati kundan kunga ko‘tariladi. Hududning katta qismida issiq ob-havoning cho‘qqisi haftaning o‘rtalariga to‘g‘ri keladi. 12–13-iyul kunlari kunduzgi havo harorati 40-42 darajagacha, janubda va cho‘l hududlarda 43-45 darajagacha ko‘tariladi.
Qoraqalpog‘iston Respublikasi va Xorazm viloyatining shimolida 11–12-iyul kunlari eng yuqori harorat 43-45 daraja bo‘lishi kutilmoqda.
Kuchli issiq qisqa muddat kuzatiladi. 13-iyulda O‘zbekistonning shimoli-g‘arbiy hududlarida, 14-iyulda respublikaning barcha hududlarida atmosferadagi janubiy oqimlar g‘arbiy oqimlarga o‘zgaradi va havo harorati 33-38 darajagacha, janubda 40 darajagacha pasayadi. Bunday harorat foni dam olish kunlarida ham saqlanib turadi.
Hafta davomida respublikaning barcha hududlari bo‘yicha havo kam bulutli va asosan quruq bo‘lishi kutilmoqda.
10–12-iyulda shimolda va cho‘l hududlarda, 13–14-iyul kunlari respublika bo‘yicha shamol tezligi 13-18 metr/sekundgacha kuchayishi, ayrim joylarda chang-to‘zon bilan kuzatilishi kutilmoqda.
Toshkentda 10–14-iyul kunlari asosan kam bulutli ob-havo bo‘ladi, yog‘ingarchilik kutilmaydi. Shamol tezligi asosan kuchsiz bo‘ladi. 10-iyul kunduz kuni harorat 37-39 daraja bo‘ladi, 11-13-iyulda harorat asta-sekin ko‘tariladi va 12–13-iyul kunlariga kelib 39-42 darajagacha bo‘ladi. 14-iyulda 36-38 darajaga tushadi.
Izoh (0)