Xorazm viloyati Urganch shahrida ayolning o‘limiga sababchi bo‘lgan avtobus haydovchisiga hukm o‘qildi. Bu haqda Oliy sud axborot xizmati xabar berdi.
Jinoyat ishlari bo‘yicha Urganch shahar sudida 1975-yilda tug‘ilgan, o‘rta ma‘lumotli, 2 nafar farzandi bor, MChJda haydovchi sifatida ishlagan fuqaroga nisbatan jinoyat ishi ko‘rib chiqildi. Sudda ma‘lum bo‘lishicha, ayblanuvchi Isuzu rusumli avtobusni Pahlavon Mahmud ko‘chasi bo‘ylab boshqarib kelayotganida yo‘lni belgilanmagan qismidan kesib o‘tayotgan piyodani urib yuborgan.
YTH natijasida fuqaro vafot etgan. Sudlanuvchi ko‘rsatmasida aybiga to‘liq iqror bo‘lib, marhumaning yaqinlaridan kechirim so‘radi. Sud aybdorning oilaviy ahvoli va aybiga to‘liq iqrorligini inobatga olib hukm qildi.
U Jinoyat kodeksining 266-moddasi 2-qismida nazarda tutilgan jinoyatni sodir etganlikda aybli deb topilib, 2 yil muddatga transport vositalarini boshqarish huquqidan, shuningdek, 4 yil muddatga ozodlikdan mahrum qilindi.
Izoh (0)