Moskvada odam o‘g‘irlash va tovlamachilik bilan shug‘ullangan qirg‘izistonliklarning jinoiy guruhi qo‘lga olindi. Bu haqda Qirg‘iziston Ichki ishlar vazirligi matbuot xizmatiga tayanib, “Daryo”ning respublikadagi muxbiri xabar berdi.
May oyi oxirida Qirg‘iziston Respublikasining Rossiyadagi diplomatik vakolatxonasiga Moskvada Qirg‘iziston fuqarolaridan iborat jinoiy guruh faoliyat yuritayotgani haqida ma’lumot kelib tushgan. Jinoiy guruh etnik prinsipda tuzilgan.
Keyinroq, 23-may kuni politsiyaga 37 yoshli qirg‘izistonlik ayoldan ariza tushgan. Ayolning so‘zlariga ko‘ra, banditlar uning qarindoshini o‘g‘irlab, undan pul undirishgan. O‘g‘irlangan shaxs ayolga yordam so‘rab murojaat qilgan va 150 ming rubl (1 843 dollar) o‘tkazishni so‘ragan.
Olib borilgan tezkor-qidiruv tadbirlari natijasida olti nafar bosqinchi qo‘lga olindi. Jinoyatchilarning barchasi Qirg‘izistonning Issiqko‘l va Norin viloyatlarida tug‘ilgan fuqarolar bo‘lib chiqdi, deyiladi IIV xabarida.
Guruhni qo‘lga olish chog‘ida yana bir jabrlanuvchi ham topilgan. Uni ijaraga olingan kvartirada majburan saqlashgan, kaltaklashgan, qurol bilan qo‘rqitib, 300 ming rubl (3 687 dollar) talab qilishgan. Yana bir faktga ko‘ra, xuddi shu turar joyda bosqinchilar qirg‘izistonlik yana bir kishiga tahdid qilib, undan 1 million rubl (12 290 dollar) talab qilishgan.
Holat yuzasidan Moskva shahri Golovinskiy tumani IIB huzuridagi tergov bo‘limi tomonidan Rossiya Jinoyat kodeksining “Tovlamachilik” va “Ozodlikdan qonunga xilof ravishda mahrum qilish” moddalari bo‘yicha ikkita jinoyat ishi qo‘zg‘atilgan.
Hozirda tergov harakatlari olib borilmoqda.
Korotovskix Yevgeniy, Qirg‘iziston