Niderlandiyada texnik nosozlik tufayli bir necha yo‘nalishdagi poyezdlar harakati to‘xtatildi. Bu haqda  The New York Times gazetasi xabar berdi.

Aniqlik kiritilishicha, muammo mamlakat yo‘l harakati nazorati xizmatidagi kompyuterlarning favqulodda o‘chirilishi bilan bog‘liq. Uskunalar poyezdlarni kuzatish va boshqarish uchun mo‘ljallangan.

Nashrning yozishicha, nosozlik yakshanba kuni sodir bo‘lgan. ProRail temiryo‘l infratuzilmasiga xizmat ko‘rsatish agentligi tizimni tuzatishga va’da berganiga qaramay, muammo hanuzgacha hal etilmagan.

“Bugun ertalab Amsterdamga ham, Amsterdamdan ham poyezdlar qatnamaydi. Maktabga yoki ishga borish uchun muqobil transportdan foydalanish tavsiya etiladi”, — deya ProRail kompaniyasi bayonotida iqtibos keltirdi The New York Times nashri. 

Hozircha muammo qancha vaqtda hal bo‘lishi ma’lum emas.