Ozarbayjon va Armaniston o‘rtasidagi chegarani delimitatsiya qilish Boku aytgan shartlarga asoslanishi kerak, dedi Ozarbayjon prezidenti Ilhom Aliyev. Lochin viloyati aholisi bilan uchrashuvda u Naxchivonga yo‘l ochilishi, Qorabog‘da haligacha bo‘lib turgan arman armiyasi vakillari u yerdan olib chiqilishi kerakligini eslatdi, deb yozmoqda “Haqqin.az”.

Aliyevning aytishicha, bu shartlar bajarilgan taqdirdagina “yumshatishlar” va amnistiya haqida gap bo‘lishi mumkin.

“Barchaga yaxshi ma’lumki, bugungi kunda o‘sha hududda istalgan operatsiyani o‘tkazish imkoniyati mavjud”, — dedi Ozarbayjon rahbari.

Uning so‘zlariga ko‘ra, separatizm va Tog‘li Qorabog‘ni Armaniston bilan birlashtirish g‘oyalariga barham berilgan. 

“Ozarbayjon qonunlariga bo‘ysunish, Ozarbayjonning sodiq, odatiy fuqarosi bo‘lish, soxta ‘davlat atributlarini’ axlat qutisiga tashlash va parlamentni tarqatib yuborish”, — deya Bokuning Qorabog‘dagi arman aholisiga qo‘ygan talablarini sanab o‘tdi Aliyev.

Avvalroq Armaniston bosh vaziri Nikol Pashinyan Tog‘li Qorabog‘ni Ozarbayjonning bir qismi sifatida tan olishga tayyorligini ma’lum qilgandi.

25-may kuni Moskvada bo‘lib o‘tgan Oliy Yevrosiyo iqtisodiy kengashi yig‘ilishida Pashinyan va Aliyev bir-birining hududiy yaxlitligini tan olishga kelishib olgan.