101 yoshli amerikalik qariya kollejni bitirganidan 80 yil o‘tib, diplom oldi (foto)

101 yoshli AQSH armiyasi faxriysi Fredrik Teylor Ayova shtatidagi Kornell kollejining bitiruv marosimida qatnashdi, u 80 yil oldin Ikkinchi jahon urushi tufayli diplom olish tadbirini o‘tkazib yuborgan, deb yozmoqda “Pravila jizni” nashri.

Teylor Kornell kollejida musiqa sohasi bo‘yicha tahsil olgan va 1943-yilda yakuniy imtihonlarni muvaffaqiyatli topshirgan. Biroq u armiya havo korpusiga qo‘shilgan va o‘quv lageriga ketgan, shuning uchun bitiruv marosimida qatnasha olmagan.

Teylor keyinroq diplom olgan, biroq uning qizi, antropologiya professori Linda otasi kollejdagi marosimni o‘tkazib yuborganidan hayron qolgan. U 2023-yilda kollej ma’muriyati bilan gaplashgan va Fredrikning boshqa bitiruvchilar bilan birga mantiya kiyib, diplom olish uchun sahnaga chiqishini kelishgan.

Teylor qizining bu ishidan juda mamnun bo‘lgan, chunki Kornell kolleji bir necha sabablarga ko‘ra uning qalbida “o‘ta muhim” o‘rin tutadi. Bu sabablardan biri uning marhum rafiqasi Peggi bo‘lib, Teylor u bilan o‘qish paytida tanishgan. Juftlikning turmush qurganiga 75 yildan oshdi. Fredrikning rafiqasi 2020-yilda vafot etgan.

Teylor armiyada xizmat qilgandan so‘ng, magistrlik darajasini oldi, so‘ngra maktabda musiqadan dars bera boshladi. U tez-tez bitiruv marosimlarida ishtirok etadigan maktab ansambllariga rahbarlik qildi va har safar o‘zining bitiruv marosimiga bormaganidan chuqur afsuslanardi. U 1983-yilda nafaqaga chiqdi va mamlakat bo‘ylab sayohat qilishni boshladi.