Ushbu mahsulot deyarli barcha organizm tizimlarining muammolarini hal qilishda yordam beradigan ko‘plab vitamin va oziq moddalarni o‘z ichiga oladi. U, shuningdek, depressiyaga qarshi vositadir. Qovoq urug‘ining organizm uchun foydali xususiyati va ularni qay tarzda qabul qilish kerakligi haqida bilib oling.
Tarkibi
Qovoq urug‘lari ozuqa moddalari, kaloriya, yog‘, oqsil va kletchatkaga boy. 100 gramm qovoq urug‘ida 574 kaloriya, 49 gramm yog‘, 6,6 gramm kletchatka va 30 gramm oqsil mavjud.
Urug‘ tarkibidagi yog‘lar asosan mono to‘yinmagan yog‘ bo‘lib, ular sog‘liq uchun foydalidir.
Shuningdek, urug‘lar B1, B2, B3, B5, B6, B9, C, E va K vitaminlarini o‘z ichiga oladi. Shuningdek, kalsiy, temir, magniy, marganets, fosfor, kaliy, natriy, sink va boshqa mikroelementlar uchraydi.
Qovoq urug‘ining organizm uchun qanday foydalari bor:
Kuchli antioksidant
Qovoq urug‘lari tarkibidagi E vitamini va karotinoidlar tufayli kuchli antioksidantdir. Ushbu antioksidantlar yallig‘lanishni kamaytiradi va organizmni turli tashqi ta’sirlardan himoya qiladi.
Yurak uchun foyda
Xuddi shu antioksidantlar yurakni qator kasalliklardan himoya qiladi. Qovoq urug‘idagi magniy qon bosimini pasaytiradi. Bundan tashqari, zararli xolesterin (LDL) va triglitseridlarni kamaytiradi.
Saratondan himoya qiladi
Urug‘larni muntazam iste’mol qilish oshqozon, ko‘krak va yo‘g‘on ichak saratoni xavfini oldini oladi. Bu urug‘larda kuchli antioksidantlar mavjudligi bilan bog‘liq.
Urug‘ tarkibidagi karotinoidlar prostata saratonini ham oldini oladi.
Qandli diabetni davolaydi
Magniy qonda qand darajasini pasaytirishga yordam beradi, bu diabetga chalinganlar uchun, ayniqsa, foydalidir. Shu bois bunday bemorlarga urug‘larni iste’mol qilish tavsiya etiladi.
Immunitetni mustahkamlaydi
Qovoq urug‘lari E vitamini va sink tufayli immunitetga koni foyda. E vitamini immunitetni kuchaytiradi va bir qator yuqumli kasalliklardan himoya qiladi. Sink yallig‘lanish, allergiya va patogenlarning organizmga kirib kelishidan himoya qiladi, shu bilan infeksiyalarning oldini oladi va umumiy immunitetni oshiradi.
Qovoq urug‘lari mikroblarga qarshi kurashuvchi xususiyatlarga ham egadir.
Uyqu sifatini yaxshilaydi
Urug‘larda mavjud bo‘lgan aminokislota triptofan osuda uyquni ta’minlaydi. U uyqu chaqiradigan va sifatini yaxshilaydigan serotonin va melatoninning manbai hamdir.
Ozishga yordam beradi
Qobiqli qovoq urug‘lari oqsil va kletchatkaga boy. Ular bizni uzoq vaqt davomida to‘q tutadi, oziq-ovqat iste’mol qilish va shunga mos ravishda iste’mol qilinadigan kaloriyalar sonini ham kamaytiradi. Bu esa vazn yo‘qotishga yordam beradi.
Suyaklarni mustahkamlaydi
Tarkibidagi magniy suyaklarning o‘sishi va mustahkamlanishi uchun zarur element hisoblanadi. Tadqiqotlarga ko‘ra, diyetasida yetarli miqdorda magniy bo‘lgan odamlarda suyak mineral zichligi yuqori bo‘ladi. Bu suyak sinishi va osteoporoz kabi xavflarning oldini oladi. Boshqacha qilib aytganda magniyning past darajasida yallig‘lanish kuchayadi. Magniy yetishmovchiligining yana bir yon ta’siri — qondagi kalsiy miqdorining pasayishi hisoblanadi. Har 100 gramm qovoq urug‘ida 262 milligrammgacha magniy mavjud. Bu miqdor mineralga bo‘lgan kunlik ehtiyojning 65 foizini qoplash uchun yetarli.
5 ta eng ko‘p beriladigan savollar:
Urug‘lar zaharli bo‘lishi mumkinmi?
Qovoq urug‘lari zaharli bo‘lmaydi. Biroq, noto‘g‘ri saqlash va ishlov berish mikotoksinlar yoki aflatoksinlar va qo‘shimcha mahsulotlar zaharli moddalar miqdorini oshiradi. Qovoqning xom urug‘lari ichak tayoqchasi va salmonellalarga ko‘proq moyil bo‘lib, ko‘ngil aynishi, qusish va diareya kabi noxush holatlarni keltirib chiqarishi mumkin. Shuning uchun uy sharoitida qovurilgan urug‘larni tanlash tavsiya etiladi.
Urug‘larni hazm qilish qiyinmi?
Ehtimol, urug‘lar tarkibidagi kletchatka tufayli biroz sekin hazm bo‘ladi. Ammo kletchatka sog‘liq uchun foydali, shu bois qovoq urug‘ida hech qanday zarar yo‘q.
Kuniga qancha qovoq urug‘ini iste’mol qilish kerak?
Haftada taxminan 140 gramm urug‘ iste’mol qilish tavsiya etiladi. Urug‘larni haddan tashqari ko‘p iste’mol qilish zararli bo‘lishi mumkin.
Urug‘larni har kuni yesa bo‘ladimi?
Ha, bo‘ladi. Har kuni taxminan 28-30 gramm urug‘ iste’mol qilish tavsiya etiladi.
Urug‘larni och qoringa iste’mol qilish mumkinmi?
Ha, ularni och qoringa iliq suv bilan ichish organizmni turli zaharli moddalardan tozalashga yordam beradi.
Izoh (0)