Cobalt va Lacetti narxlari oshishi haqidagi xabarlar yolg‘on — UzAuto Motors
Ijtimoiy tarmoqlarda Cobalt va Lacetti narxlari 20-23 ming dollardan boshlanishi haqida xabarlar tarqaldi. UzAuto Motors bunga munosabat bildirdi.
Kompaniyaning xabar berishicha, ommaga Cobalt va Lacetti narxlari oshirilishi bo‘yicha hech qanday maʼlumot taqdim qilinmagan.
“Ijtimoiy tarmoqlarda 1-iyundan boshlab UzAuto Motors Damas, Labo, Cobalt va Lacetti avtomobillarining yangilangan versiyasini taqdim qilishi, Cobalt va Lacetti narxlari esa 20-23 ming dollardan boshlanishi haqida xabarlar tarqaldi. UzAuto Motors bu bo‘yicha hech qanday ma’lumot taqdim qilmagan. Ushbu ma’lumotlar hech qanday asosga ega emas va yolg‘onligini ta’kidlab o‘tish kerak. Turli sahifa egalaridan odamlar eʼtiborini tortish uchun ular qiziqqan yo‘nalishda biror bir faktga asoslanmagan axborotni tarqatmaslikni so‘rab qolamiz. Kompaniya va mahsulotlar narxi haqida rasmiy sahifalarimiz orqali bilib olishingiz mumkin”, — deyiladi xabarda.
Eslatib o‘tamiz, 2022-yil dekabrda Lacetti, Cobalt, Damas va Labo avtomobillariga shartnomalar qabul qilish to‘xtatilgandi.
“O‘zbekistonda avtomobillarga bo‘lgan talabning anomal o‘sishi va global muammolar kuchayganini hisobga olib, kompaniya bunday sharoitda boshqa avtomobil ishlab chiqaruvchilar tomonidan qo‘llanilgan yo‘ldan borishni to‘g‘ri deb hisoblaydi va Lacetti, Cobalt, Damas hamda Labo avtomobillariga shartnomalar qabul qilishni vaqtincha to‘xtatadi. Bu o‘z navbatida barcha saʼy-harakatni avval tuzilgan shartnomalar bo‘yicha avtomobil ishlab chiqarishga yo‘naltiradi”, — deya aholiga murojaat qilgandi UzAuto Motors.
