Prezidentning “Osiyo taraqqiyot banki ishtirokida “O‘zbekiston Respublikasida shaharlarni kompleks rivojlantirish dasturi” loyihasini amalga oshirish chora-tadbirlari to‘g‘risida” qarori qabul qilindi, deb xabar beradi Norma.
“O‘zbekiston Respublikasida shaharlarni kompleks rivojlantirish dasturi” loyihasini amalga oshirish uchun Osiyo taraqqiyot banki (OTB) bilan 59 million dollar miqdoridagi qarz bitimini imzolash bo‘yicha dastlabki kelishuvga erishilgan.
Bunda O‘zbekistonning xalqaro shartnomalari bo‘yicha xalqaro moliya institutlari va xorijiy hukumat moliya tashkilotlarining mablag‘lari (qarzlari, kreditlari) hisobidan amalga oshiriladigan loyihalar doirasida olinadigan tovarlar bojxona bojidan ozod qilingan.
Loyihani amalga oshirish muddati 5 yilni (2023—2027-yillar) tashkil etadi. Investitsiyalar, sanoat va savdo vazirligi loyihaning o‘z vaqtida amalga oshirilishi, OTB qarzlaridan maqsadli va samarali foydalanilishi uchun masʼul bo‘lgan ijro etuvchi organ sifatida belgilangan.
Hujjat bilan quyidagilar tasdiqlandi:
- “O‘zbekiston Respublikasida shaharlarni kompleks rivojlantirish dasturi” loyihasini texnik-iqtisodiy asoslashning asosiy texnik-iqtisodiy parametrlari;
- “O‘zbekiston Respublikasida shaharlarni kompleks rivojlantirish dasturi” loyihasi bo‘yicha Osiyo taraqqiyot banki qarzini so‘ndirish va foizlarni to‘lashning prognoz jadvali;
- “O‘zbekiston Respublikasida shaharlarni kompleks rivojlantirish dasturi” loyihasi doirasida Osiyo taraqqiyot banki qarzini 2028-yildan boshlab qoplash yuzasidan ulushlar taqsimotining prognoz jadvali;
- “O‘zbekiston Respublikasida shaharlarni kompleks rivojlantirish dasturi” loyihasi 2-komponenti doirasida Osiyo taraqqiyot banki qarzi bo‘yicha xizmat ko‘rsatish xarajatlarini qoplash yuzasidan ulushlar taqsimotining prognozi.
Hujjat Qonun hujjatlari maʼlumotlari milliy bazasida eʼlon qilingan va 19-apreldan kuchga kirdi.
Fevral oyida Osiyo taraqqiyot banki O‘zbekistonda iqtisodiy boshqaruvni yaxshilash uchun 150 mln AQSH dollari miqdorida qarz va 400 ming AQSH dollari miqdorida grant ajratilishini ma’qullagandi. Shuningdek, Islom taraqqiyot banki O‘zbekistonda maktablar qurish va ta’mirlashga mablag‘ ajratishi, O‘zbekiston va Jahon banki qo‘shma loyihalari portfeli 10 milliard dollardan oshgani, YIB O‘zbekistonning quyosh elektr stansiyalarini qurish uchun 83,6 million dollar ajratishi to‘g‘risida xabar berilgandi.
Izoh (0)