Soliq qo‘mitasi 27,1 mlrd so‘m foyda solig‘ini qaytardi
Soliq qo‘mitasi tomonidan Toshkent shahrida foyda solig‘i bo‘nak to‘lovlari hisobidan budjetga undirilgan ortiqcha mablag‘larni qaytarish choralari ko‘rilmoqda.
Zudlik bilan amalga oshirilgan tadbirlar natijasida 28-mart kuni soat 15:00 ga qadar 367 ta korxona bo‘yicha ortiqcha undirilgan 28,5 mlrd so‘mlik foyda solig‘i bo‘nak to‘lovlaridan 352 ta korxonaga 27,1 mlrd so‘m qaytarilishi ta’minlandi. Yana qolgan 1,4 mlrd so‘mlik mablag‘lar ham qaytarilishi ta’minlanadi.
DSQ tomonidan tezkor o‘rganilib, kamchiliklarga yo‘l qo‘ygani uchun Soliq qo‘mitasi mas’ul nazorat departamenti boshlig‘i B.Muqimov va Toshkent shahar bo‘lim boshlig‘i O.Lutfullayev egallagan lavozimidan ozod etilgan.
Shuningdek, Toshkent shahar soliq boshqarmasi boshlig‘i Y.Nasimjonov va boshqarma boshlig‘ining birinchi o‘rinbosari J.Mirpo‘latovning maxsus unvonlari bir pog‘onaga pasaytirilib, intizomiy jazo chorasi belgilangan. Soliq qo‘mitasi soliq to‘lovchilarga xizmat ko‘rsatish departamenti boshlig‘i X.Bazarovga nisbatan esa hayfsan intizomiy jazo chorasi tayinlangan.
