“Maʼmuriy jarimalarni to‘lashda aholiga qo‘shimcha qulayliklar yaratish hamda sohada korrupsion omillarni bartaraf etish chora-tadbirlari to‘g‘risida”gi prezident qarori qabul qilindi. Qaror matni “Daryo” tahririyatida mavjud.
Qarorga muvofiq, Majburiy ijro byurosi tomonidan qo‘llanadigan maʼmuriy jarima miqdori ijro hujjatida undirilishi belgilangan summadan yuqori bo‘lishi mumkin emasligi belgilandi.
“Majburiy ijro byurosi nomidan maʼmuriy huquqbuzarliklar to‘g‘risidagi ishlarni ko‘rib chiqishga hamda maʼmuriy jazo qo‘llashga faqat O‘zbekiston Respublikasining Bosh davlat ijrochisi, Qoraqalpog‘iston Respublikasi, viloyatlar va Toshkent shahrining bosh davlat ijrochilari, ularning o‘rinbosarlari, shuningdek, Majburiy ijro byurosining tuman (shahar) bo‘limi boshliqlari haqlidir”, — deyiladi qarorda.
Shuningdek, hujjat bilan Oliy sud, Ichki ishlar vazirligi va Adliya vazirligining sudlanganlik muddati tugallanishi va uni olib tashlash yo‘nalishida byurokratiya va sansolarlik holatlariga chek qo‘yish, shuningdek, eskirgan va zamon talablariga mos kelmaydigan tartib-taomillarni tubdan qisqartirish maqsadida sohaga proaktiv shakldagi davlat xizmatlarini ko‘rsatish tamoyillarini joriy etish to‘g‘risidagi taklifiga rozilik berilgan.
2023-yil 1-sentabrdan boshlab:
- sudlanganlik muddatining o‘tib ketgani yoki sudlanganlikning olib tashlanishi haqidagi maʼlumotlar Ichki ishlar vazirligining “Tezkor maʼlumotlar” yagona axborot tizimida avtomatik ravishda onlayn shakllantiriladi;
- sudlanganlik muddatining o‘tib ketgani yoki sudlanganlikning olib tashlangani haqidagi maʼlumotnoma, sudlanganlik muddati tugagan yoki sudlanganlik olib tashlangan sananing ertasidan kechiktirmasdan tegishli shaxsning Yagona interaktiv davlat xizmatlari portalidagi shaxsiy kabinetiga avtomatik ravishda bepul yuboriladi.
Ichki ishlar vazirligi Oliy sud, Bosh prokuratura va Raqamli texnologiyalar vazirligi bilan birgalikda 2023-yil 1-iyulga qadar mazkur talab ijrosini taʼminlash bilan bog‘liq barcha zarur choralarni ko‘radi.
Bunda, jumladan, “Elektron jinoiy-huquqiy statistika” yagona axborot tizimida quyidagi maʼlumotlar avtomatik ravishda aks ettirilishini taʼminlash yo‘lga qo‘yiladi:
- Oliy sud va Ichki ishlar vazirligining axborot tizimlarini o‘zaro integratsiya qilish orqali sudda ixtiyoriy to‘langan jarimalar, sud qarorlarini ijro etishda yuzaga keladigan masalalarni hal etish bilan bog‘liq materiallarning ko‘rilishi haqidagi maʼlumotlar;
- Majburiy ijro byurosi va Ichki ishlar vazirligining axborot tizimlarini o‘zaro integratsiya qilish orqali undirilgan jarimalar haqidagi maʼlumotlar;
- “Probatsiya hisobi” elektron bazasi bilan “Elektron jinoiy-huquqiy statistika” yagona axborot tizimini o‘zaro integratsiya qilish orqali probatsiya hisobidan ozod etilgan shaxslar haqidagi maʼlumotlar.
Avvalroq mazkur qaror bilan O‘zbekistonda endilikda barcha jarimalar vaqtliroq to‘lasa, chegirma berilishi ma’lum qilingandi.
Izoh (0)