“Vagner” xususiy harbiy kompaniyasi asoschisi Yevgeniy Prigojinning da’vo qilishicha, kompaniya rossiyalik mahbuslarni urushda qatnashish uchun yollashni to‘xtatgan. Bu haqda u jurnalistlarning savoliga javoban aytdi. Prigojinning so‘zlarini uning matbuot xizmati keltirmoqda.
“Vagner” guruhida mahbuslarni yollash butunlay toʻxtatilgan. Hozir bizda ishlayotganlarning oldiga qo‘yilgan barcha majburiyatlar bajarilmoqda, — dedi Prigojin. U kompaniya nima sababdan mahbuslarni yollashdan voz kechganini aytmadi.
“Vagner” 2022-yilning yozida Rossiyaning Ukrainaga bosqinida qatnashish uchun mahbuslarni yollashni boshlagandi. AQSH va Buyuk Britaniya rasmiylarining dekabr—yanvar oylaridagi hisob-kitoblariga ko‘ra, guruh 40 000 mahbusni yollashga muvaffaq bo‘lgan.
Yanvar oyida “Rus sidyashaya” fondi rahbari Olga Romanova “Vagner” guruhi 50 ming mahbusni jalb qilgan bo‘lishi mumkinligini aytdi. Romanovaning ta’kidlashicha, frontda 10 mingga yaqin odam qolgan, boshqalari esa o‘lgan, yaralangan, bedarak yo‘qolgan, tashlab ketilgan yoki asirga olingan.
Fevral oyi boshida Olga Romanova Rossiya koloniyalari urushda qatnashish uchun asirlarni jalb qilishda davom etayotgani haqida xabar berdi, ammo yollayotgan odamlar “Vagner” emas, balki Rossiya Mudofaa vazirligi vakillari ekanini aytishgan.
Izoh (0)