Nukus voqealari bo‘yicha uch nafar huquqni muhofaza qiluvchi organ xodimi qamoqqa olindi 

Nukus voqealarida huquqni muhofaza qiluvchi organ xodimlarining noqonuniy xatti-harakatlari yuzasidan qoʻzgʻatilgan jinoyat ishlari tergovi doirasida uch nafar shaxsga nisbatan Jinoyat kodeksining tegishli moddalari bilan ayblov eʼlon qilindi, deb xabar bermoqda Bosh prokuratura matbuot xizmati.

Ma’lum qilinishicha, ularga nisbatan qamoqqa olish tarzidagi ehtiyot chorasi qoʻllanildi. Hozirda jinoyat ishlari boʻyicha tergov harakatlari davom etmoqda. Tergov natijasi boʻyicha jinoyat ishlarining sudga yuborilishi taʼminlanadi.

Shavkat Mirziyoyev 2022-yilning iyulida o‘tkazilgan yig‘ilishda Nukusda bo‘lib o‘tgan voqealar haqida gapirib, “Kuch tuzilmalarining harakatlari ham chuqur tahlil qilinsin. Agar ular tomonidan noto‘g‘ri kuch ishlatilgan bo‘lsa, amaldagi qonunchilikka asosan ularning ham jinoiy javobgarligi ta’minlansin”, deb aytgandi.

31-yanvar kuni Buxoro viloyati sudida 1−2-iyul kunlari Nukus voqealarida ayblanayotgan 22 nafar sudlanuvchiga nisbatan jinoyat ishini ko‘rib chiqish yakunlari bo‘yicha sud hukmi e’lon qilindi. Hukm qilinganlardan biri — Polat Shamshetov 4-fevral kuni tergov hibsxonasida vafot etdi. Mustaqil komissiya uning o‘limi yuzasidan tekshiruv o‘tkazib, marhumga nisbatan ruhiy yoki jismoniy qiynoq qoʻllanilishi mumkinligiga oid maʼlumotlar assosiz ekanini aniqladi. 

Bosh prokuratura axborotiga ko‘ra, 2023-yil 17-yanvar kuni 18 va 21 nafar shaxsga (barchasiga qamoq ehtiyot chorasi qoʻllanilgan) nisbatan Jinoyat kodeksining 244-moddasi va boshqa tegishli moddalar bilan boʻlgan ikkita jinoyat ishi ayblov xulosasi bilan mazmunan koʻrish uchun Qoraqalpogʻiston sudiga yuborilgan.

6-fevral kuni 39 nafar sudlanuvchiga oid jinoyat ishini koʻrib chiqish boʻyicha ochiq sud jarayoni boshlandi.