Shavkat Mirziyoyev Sergelidagi mahalla aholisi bilan muloqot qildi

Shavkat Mirziyoyev 8-fevral kuni Toshkent shahrining Sergeli tumanidagi “Ezgulik” mahallasida bo‘lib, aholi hayoti bilan tanishdi. Bu haqda Prezident matbuot xizmati xabar qildi.

Qayd etilishicha, bu yerda 26 ta ko‘p qavatli uy bor, 6 mingdan ziyod aholi yashaydi. Prezident mahalla vakillaridan hol-ahvol so‘ragan. Nuroniylar o‘tgan sovuq kunlarda fuqarolarning va davlat idoralari xizmatchilarining birligi bilan qiyinchilik ortda qoldirilganini aytgan. Energetika va kommunal xizmatlar 24 soat davomida ishlagan, tezkor choralar ko‘rib borilgan. Xususan, mahalladagi transformator ham yangilangan.

“Bu bizga saboq bo‘lishi kerak. Energetikada 3-4 karra ko‘proq zaxira yaratishimiz zarur. Shuning uchun qayta tiklanuvchi energetikani rivojlantirishga e’tibor beryapmiz. U — muqobil, ishonchli va ekologik toza”, — deydi davlat rahbari.

“Nuroniylar yurtimizga tinchlik-xotirjamlik, xalqimizga farovonlik tilab duo qildi”, — deyiladi xabarda.