O‘zbekistonda chet elliklarni vaqtinchalik ro‘yxatga olish bo‘yicha talablar soddalashtirilmoqda

O‘zbekistonda chet el fuqarolarini vaqtincha ro‘yxatga olish uchun yagona muddat o‘rnatilmoqda. Bu haqda Norma xabar berdi.

Ma’lum qilinishicha, chet el fuqarolari va fuqaroligi bo‘lmagan shaxslarni ro‘yxatga olish tartibi takomillashtirilgani munosabati bilan 30-yanvar kuni  Vazirlar Mahkamasining 2020-yil 28-sentabrdagi 593-son qarori bilan tasdiqlangan O‘zbekiston Respublikasi hududida chet el fuqarolari va fuqaroligi bo‘lmagan shaxslarni vaqtincha turgan joyi bo‘yicha ro‘yxatga olish tartibi to‘g‘risidagi nizomga o‘zgartirishlar kiritish haqidagi qarori qabul qilindi.

Unda aytilishicha, respublikaga kirib kelayotgan chet el fuqarolari va fuqaroligi bo‘lmagan shaxslarni ichki ishlar organlarida vaqtincha turar joyi bo‘yicha ro‘yxatga olish jarayonlarida ayrim noqulayliklar borligi muammo bo‘lib qolmoqda.

Hujjat bilan chet el fuqarolarini migrasiya va fuqarolikni rasmiylashtirish bo‘limlari, joylashtirish vositalari yoki davolash muassasalarida vaqtincha ro‘yxatga olish uchun yagona muddat o‘rnatilmoqda – 3 kun ichida.

Shuningdek, mamlakatda bo‘lish qoidalarini buzgan, shuningdek, boshqa qoidabuzarliklarga yo‘l qo‘ygan chet el fuqarolari va fuqaroligi bo‘lmagan shaxslarni joylashtirish vositalari va davolash muassasasida vaqtincha ro‘yxatga olishni faqat ichki ishlar organlaridan ruxsat olingandan keyin amalga oshirish tartibi bekor qilinmoqda.

Endilikda bunday huquqbuzarliklarga yo‘l qo‘ygan chet el fuqarolari va fuqaroligi bo‘lmagan shaxslarni joylashtirish vositalari va davolash muassasalarining ma’muriyati, xususiy uy-joy egalari hududiy ichki ishlar organlariga “E-mehmon” dasturi orqali xabar bergan holda joylashtiradi.

Ushbu hujjat 31-yanvardan kuchga kirdi.