“PSJ” hujumchisi Kilian Mbappe “Real”ga o‘tmaganidan afsusda.
Fransuz o‘tgan yili yozda qilgan xatti-harakatidan norozi bo‘lmoqda va endi Madrid klubiga o‘tishni intiqlik bilan kutmoqda, deya yozadi El Chiringuito TV.
Undan tashqari Kilian atrofidagilarga “PSJ” bilan amadagi shartnomasi 2025-yilgacha emas, 2024-yilga qadar mo‘ljallanganini ma’lum qilgan.
Shuningdek, “Real” direktorlar kengashi a’zosi ham Mbappening “qaymoqranglilar” safiga o‘tishi mumkinligini inkor etmadi.
“Florentino Peres bor ekan, hech narsani inkor etib bo‘lmaydi. Agar Mbappening taqdiriga Madridga o‘tish yozilgan bo‘lsa, u klub mezonlariga mos kelsa, bu albatta sodir bo‘ladi. Aksincha bo‘lsa, uni bu yerda ko‘rmaymiz. Shunda boshqa futbolchilarni izlaymiz.
Florentino klub foydasi uchun har qanday ishni amalga oshira olishiga ishonaman”, — deydi Katalina Minyarro.
Eslatib o‘tamiz, 2022-yil yozida Kilian erkin agent sifatida “Real”ga o‘tishi mumkin edi, biroq so‘nggi lahzalarda “PSJ” bilan shartnomasini uzaytirib, jamoada qolishni maq’ul ko‘rgan.
24 yoshli futbolchi joriy mavsum “PSJ” safida 25 ta o‘yinda maydonga tushib, 25 ta gol va 6 ta golli uzatmaga mualliflik qildi.
Izoh (0)