“Chelsi” Angliya futbolidagi rekord narx evaziga Enso Fernandesni sotib oldi

“Benfika” yarim himoyachisi Enso Fernandes faoliyatini “Chelsi”da davom ettiradi.

Bu haqdagi ma’lumot dastlab Portugaliya qimmatli qog‘ozlari bozori komissiyasi saytida paydo bo‘ldi. Keyinroq lissabonliklar transferni tasdiqladi.

Londonliklar klubi 22 yoshli futbolchi uchun “Benfika”ga 121 million yevro to‘laydi. Ushbu miqdor bir necha qismga bo‘linib to‘lanadi.

Futbolchining “ko‘klar” bilan shartnomasi 2031-yilning yoziga qadar mo‘ljallangan.

121 million yevro (105 million funt) — Angliya futboli tarixidagi eng qimmat transfer. Bunga qadar eng qimmat transfer sifatida “Aston Villa”dan 100 million funt evaziga “Manchester Siti”ga o‘tgan Jek Grilish qayd etilgandi.

Argentinalik “Chelsi” qishki transfer oynasida olib kelgan sakkizinchi o‘yinchi bo‘ldi. klub Todd Bouli rahbarlikka kelganidan keyin jami 16 ta xaridni amalga oshirdi.

Fernandes “Benfika” safida 2022-yilning yozida “River Pleyt”dan borib qo‘shilgandi.

Enso Argentina safida JCH—2022 da g‘oliblikni qo‘lga kiritdi. U Qatar mundialining eng yaxshi yosh o‘yinchisi deb topilgandi.