“Bayden dunyoni uchinchi jahon urushi yoqasiga olib keldi” — Tramp

AQSH prezidenti Jo Baydenning qobiliyatsizligi dunyoni uchinchi jahon urushiga olib keldi, dedi mamlakat sobiq prezidenti Donald Tramp Janubiy Karolina va Nyu-Xempshirda Respublikachilar partiyasining yillik yig‘ilishida so‘zlagan nutqida.

“O‘zining zaifligi va qobiliyatsizligi tufayli Jo Bayden bizni uchinchi jahon urushi yoqasiga olib keldi. Biz uchinchi jahon urushi arafasida turibmiz”, — dedi Tramp. U 2024-yilgi saylovlarda yana prezident bo‘lsa, “tinchlik davrini kuch bilan” qaytara olishini qo‘shimcha qildi.

Tramp, shuningdek, agar u hozir AQSH prezidenti bo‘lganida bir kun ichida Rossiya va Ukraina o‘rtasida tinchlik bitimi tuzilardi, degan fikrini takrorladi.

Nyu-Xempshirdagi nutqida Trampning aytishicha, Bayden davrida AQSH uning siyosatchilari korrupsiyasi tufayli vayron bo‘lmoqda. Tramp Amerika millatining parchalanishida Demokratik partiya tepasida o‘tirgan “radikal so‘lchi”ni aybladi.

Janubiy Karolina va Nyu-Xempshirdagi nutqlar Tramp 2024-yilda saylovga o‘z nomzodini e’lon qilganidan beri uning saylovoldi kampaniyasidagi birinchi qadam bo‘ldi. Amaldagi prezident Jo Bayden ikkinchi muddatga o‘z nomzodini qo‘yish haqida hali bir qarorga kelmagan.