FIFA Urugvay terma jamoasini JCH—2022 dagi harakatlari uchun jazoladi.
Urugvay guruh bosqichining so‘nggi turida Ganani 2:0 hisobida mag‘lub etgan, biroq pley-offga chiqa olmagandi.
Shundan so‘ng Janubiy Amerika vakillari janjal yuzaga keltirgandi. “Atletiko” himoyachisi Xose Ximenes hakamning sha‘niga nomaqbul so‘zlar aytgandi. Urugvay futbolchilari Gana darvozasi tomon 2 ta penaltini belgilamagan uchrashuv hakami Daniel Zibert yoniga borib, unga norozilik bildirgan. Ximenes Zibertga yaqinlashaman deb bexosdan JCH—2022 tashkilotchilik bo‘yicha FIFA direktorlaridan birini urib yuborgan.
Xalqaro futbol federatsiyasi Urugvay futbol assotsiatsiyasini muxlislarning kamsituvchi harakatlari, shuningdek, futbolchilarning nojo‘ya xatti-harakatlari, haqoratlari va halol o‘yin tamoyillarini buzgani uchun jazoladi.
Endi Urugvay FIFA tasarrufidagi keyingi o‘yinlarini muxlislarsiz stadionda o‘tkazadi. Shuningdek, assotsiatsiya 50 ming shveysar franki (50 ming yevro) miqdorida jarima to‘laydi.
Urugvayning futbolchilariga ham alohida jarima belgilandi. Ximenes 4 ta o‘yinga diskvalifikatsiya qilindi va 20 ming frank to‘laydigan bo‘ldi. Undna tashqari FIFAning jamoat ishlarida ishtirok etishi majburiy etib belgilandi. “Galatasaroy” darvozaboni Fernando Muslera ham xuddi shunday jarimaga tortildi.
“Valensiya” hujumchisi Edinson Kavani bitta o‘yinga chetlatildi, shuningdek, 15 ming frank jarimaga tortildi. Xuddi shunday jazo “Veles Sarsfild” himoyachisi Diyego Godinga ham belgilandi.
Izoh (0)