“Ko‘pchilik meni yolg‘on ma’lumot tarqatganlikda ayblaydi” — Shohrux G‘iyosov jurnalist va blogerlarning o‘ziga munosabati haqida gapirdi

“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 16-soni mavzusi “Ichki ishlarning ichki ishlari” bo‘lib, dastur mehmoni sifatida IIV matbuot kotibi Shohrux G‘iyosov taklif etildi.

Ichki ishlar vazirligi matbuot kotibi efir davomida bir obunachining ommaviy axborot vositalarida so‘z erkinligi nega ta’minlanmayotgani haqidagi savoliga javob berar ekan, jurnalistlardan ko‘ra ba’zi blogerlarning noxolisligi haqida ham to‘xtalib o‘tdi.

— Ijtimoiy tarmoqlarda axborot tarqatuvchilar bor. OAV jurnalistlari shu yo‘nalishda o‘qigan, ularda mediasavodxonlik yuqori, nima ma’lumot berishni biladi, so‘rab-surishtiradi, xolis yondashadi. Lekin blogosferada munosabat so‘rashmaydi, chiqqan ma’lumotni darrov qo‘yib yuborishadi, keyin shu bo‘yicha munosabat kutishadi. Biz hammasiga ham munosabat bermaymiz, hodisa shov-shuvga sabab bo‘lsa yoki rezonans keltirib chiqarsa, haqiqatan tushuntirish kerak bo‘lsagina, munosabat beriladi. Lekin har qanday holatda reaksiya qilinadi, holat o‘rganiladi. 

Matbuot kotiblari haqida turli gaplar aytishadi, masalan, Anora Sodiqovaning shunaqa odati bor, G‘iyosov yolg‘on ma’lumot berdi, deydi. Buning hammasi nimadan kelib chiqadi? Ma’lumot berilgandan keyin ko‘pchilik xabarning ichiga kirmaydi, bosh qismini ko‘radi, izohlariga kiradi. Birinchi to‘rtta izoh ijobiy bo‘lsa, ijobiy fikr yozadi yoki indamaydi. Agar kommentlar salbiy bo‘lsa, ichidagi bor alamzadaligi aks etgan fikrlarini yoza boshlaydi. Biz buni juda yaxshi tushunamiz.

Shuning uchun har doim blogerlarga aytaman, sizlar avval bizdan so‘ranglar, ma’lumot berganimizdan keyin sahifalaringga qo‘yinglar, deb. Shunday paytlar bo‘lganki, bloger “Sizdan ma’lumot olsam, buning nima qizig‘i qoladi?” degan. Chunki shov-shuv qilgisi keladi. Shundan kelib chiqqan holda, bizni umumiy ma’lumot beryapti yoki holatni to‘liq ochib bermayapti, degan fikrlar kelib chiqadi.

Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.