Tashkent Index’dagi talabalar majburan chiqarib yuborilishiga yo‘l qo‘yilmaydi — vazirlik

Oliy ta’lim, fan va innovatsiyalar vazirligi Tashkent Index’dagi talabalarni ayrim oliy taʼlim muassasalari tomonidan yotoqxonalarga koʻchirilayotgani ijtimoiy tarmoqlarda notoʻgʻri talqin qilinayotganini ma’lum qildi.

Oʻquv yili boshida Tashkent Index savdo majmuasida talabalar vaqtincha turishlari uchun sharoit yaratilgan edi. Oʻtgan davr mobaynida aksariyat oliy taʼlim muassasalari tomonidan talabalar turar joylarida qoʻshimcha yotoq oʻrinlari yaratilib, koʻchish istagini bildirgan talabalar koʻchirib oʻtkazildi.

Vazirlik matbuot xizmatining bildirishicha, shu kunlarda sovuq havo haroratida majmua yetarli sharoitga ega emasligi bois, koʻchirish ishlari oliy oʻquv yurtlari talabalar turar joylarida koʻproq qoʻshimcha boʻsh oʻrinlari yaratilishi, aksariyatida yangi yotoqxonalar barpo etilishi hisobiga yanada jadallashdi.

Bunda Tashkent Index’da qolishni xohlovchi talabalarni majburan chiqarib yuborilishiga yoʻl qoʻyilmaydi.

“Maʼlumot oʻrnida, birgina Toshkent davlat iqtisodiyot universitetida ikki qavatli yotoq oʻrni tashkil etish hisobiga qoʻshimcha 139 oʻrinli, Toshkent davlat pedagogika universiteti tomonidan Oqtepa pedagogika kolleji talabalar turar joyida yangi 300 oʻrinli joy yaratilgan.

Shu kabi boshqa oliy taʼlim muassasalari ham hozirda ichki imkoniyatdan kelib chiqib, qoʻshimcha oʻrinlar hozirlagan. Bundan tashqari, Toshkent davlat stomatologiya institutida 400 oʻringa moʻljallangan yangi yotoqxona qurib, foydalanishga topshirildi”, — deyiladi xabarda.