UEFA Jahon Chempionati saralashi va Millatlar Ligasi turnirini isloh qilishni muhokama qiladi

UEFA terma jamoalar o‘rtasidagi musobaqalarni isloh qilishni muhokama qiladi. 

Shveysariyaning Nyon shahrida tashkilot ijroiya qo‘mitasining yig‘ilishi bo‘lib o‘tadi. Unda Yevropa musobaqalaridagi islohotlarga oid bir qancha savollar muhokama qilinadi.

Dastlab, Jahon Chempionati uchun yangi saralash tizimi masalasi ko‘riladi. 2026-yildan boshlab Jahon Chempionatida 48 ta jamoa ishtirok etadi, ulardan 16 tasi Yevropa vakillari. Shu munosabat bilan UEFA saralash bosqichini o‘zgartirishni rejalashtirmoqda.

Saralash bosqichida 4 yoki 5 ta jamoadan iborat 12 ta guruh tuzilishi mumkin. Tizimga ko‘ra, guruhlarda birinchi o‘rinni egallagan jamoalar to‘g‘ridan to‘g‘ri mundialga yo‘llanma oladi, qolgan 4 ta o‘rin esa pley-offda o‘ynaladi. 

Bu ko‘rib chiqilayotgan yagona variant emas, lekin joriy saralashdagi har qanday o‘zgarishlar o‘yinlar sonini qisqartirishga qaratilgan bo‘ladi — o‘tgan yillarda hech qanday ahamiyatga ega bo‘lmagan o‘yinlar tufayli ma’lum bir televizion auditoriya yo‘qotilgan. 

Shuningdek, UEFA Millatlar Ligasi formatiga ham o‘zgartirish kiritish masalasini ko‘rib chiqadi. Agar avvalroq “A” ligasi guruhlarida birinchi o‘rinni egallagan jamoalar final to‘rtligiga kirgan bo‘lsa, endi ikkinchi o‘rinni egallagan jamoalar ham ishtirok etadigan pley-off o‘yinlari ham paydo bo‘lishi mumkin. 

Qayd etilishicha, UEFA Yevropa chempionatida ishtirok etuvchi jamoalar sonini 32 taga kengaytirishga qarshi chiqqan. Yangi format 2028-yildan boshlab joriy etilishi ko‘zda tutilgandi, biroq UEFA bu islohotni rejalardan chiqarib tashlashga qaror qildi. Bunday format turnirning ahamiyati va nufuzini pasaytiradi deb hisoblanmoqda.