Shimoliy Koreya hukumati nafas yo‘llari kasalliklari bilan og‘rish holati ko‘payib borayotgani sababli Pxenyan aholisi uchun besh kunlik karantin joriy etishni buyurdi. Bu haqda NK News KXDR hukumatining rasmiy bayonotiga tayanib xabar bermoqda.
Nashr xabariga koʻra, Shimoliy Koreya poytaxtida chorshanbadan yakshanbaga qadar (25—29-yanvar) karantin joriy qilingan.
Hukumat xabarnomasida karantinga sabab sifatida nafas yo‘llari kasalliklari, jumladan, shamollash ko‘rsatilgan. COVID-19 haqida hech qanday gap yo‘q.
NK News xabar berishicha, Pxenyan aholisi yakshanba kuni oxirigacha uyda qolishi va har kuni bir necha marta haroratini o‘lchashi kerak.
Shimoliy Koreya davlat ommaviy axborot vositalari yangi choralar haqida hali e’lon qilmadi.
KXDR rasmiylari birinchi marta 2022-yil may oyida mamlakat fuqarosi koronavirus bilan kasallangani haqida xabar bergandi. Iyul oyi oxirigacha bo‘lgan uch oy ichida mamlakatda 4,77 milliondan ortiq odam koronavirus bilan kasallangan, o‘shanda Pxenyan kasallanish holatining ko‘payishiga Janubiy Koreyadan “virusli” havo sharlari uchib kelayotganini sabab qilib ko‘rsatgan. Avgust oyida shifokorlar birorta ham kasallik qayd etmadi. 11-avgust kuni KXDR rahbari infeksiya ustidan g‘alaba qozonganini e’lon qildi.
Yanvar oyining ikkinchi yarmida Shimoliy Koreyada hujjatli film namoyish etildi, unda koronavirusga qarshi kurashning natijasi “sayyoradagi mo‘jiza” va mamlakat tarixida “misli ko‘rilmagan voqea” deb atalgan.
Izoh (0)