Bel og‘rig‘i odam duch keladigan barcha turdagi og‘riq sindromlarining eng keng tarqalganidir. Ba’zi ma’lumotlarga ko‘ra, erkak va ayollarning 80 foizi umurtqa pog‘onasining turli qismlari yoki mushak og‘rig‘i bilan kasallanadi. Ko‘p hollarda bel kasalliklarning rivojlanishidan qochish yoki hech bo‘lmaganda ularning rivojlanishini sezilarli darajada sekinlashtirish mumkin. Buning uchun “Noviy ochag” nashri sanab o‘tgan odatlardan voz kechish tavsiya etiladi.
Haddan tashqari yumshoq o‘rinda uxlash
To‘g‘ri yotoq tanlash sog‘liq uchun juda muhimdir. U juda qattiq bo‘lmasligi kerak, ayniqsa keksa yoki ortiqcha vaznli odamlar uchun tanlangan bo‘lsa. Ammo u juda yumshoq ham bo‘lmasligi lozim, aks holda umurtqa pog‘onasi yetarli darajada qo‘llab-quvvatlanmaydi. 2003-yilda The Lancet jurnalida chop etilgan tadqiqot shuni ko‘rsatdiki, yumshoq to‘shakda uxlash umurtqa pog‘onasi kasalliklarini rivojlanish xavfini ikki baravar oshiradi.
Telefonda ko‘p gaplashish
Eng yomon holat telefonda gaplashish, ya’ni mobil telefonni yelka va quloq o‘rtasida ushlab turishdir. Ammo qo‘llardan foydalansangiz ham suhbat davomida boshni egib, bir yelkani ko‘tarib, gavdani qiyin holatda qoldirish mumkin. Natijada bo‘yin va umurtqa pog‘onasida mushaklarning zo‘riqishi paydo bo‘ladi va bularning barchasi umurtqa pog‘onasi sog‘lig‘ining buzilishiga olib kelishi mumkin. Agar mobil telefonda tez-tez va uzoq vaqt gaplashsangiz, eshitish vositasidan foydalaning yoki messenjerlardan foydalaning.
Uy ishlarini bajarish
Kir yuvish, idish-tovoq tozalash, dazmollash, chang artish — bu kundalik yumushlarning barchasi bel uchun haqiqatan ham dushmandir. Ulardan uzoqlashishning iloji yo‘q, lekin belga ozgina yordam berish mumkin. Agar tik turgan holda biron bir ish bilan mashg‘ul bo‘lsangiz, birinchidan, yelkani, ikkinchidan, umurtqa pog‘onasini to‘g‘rilash va tana vaznini bir oyoqqa o‘tkazmaslik, uchinchidan, tizzalarni egmaslik kerak. Shundagina kamroq charchash mumkin, chunki yuk umurtqa pog‘onasi bo‘ylab teng taqsimlanadi va bel sohasi deyarli azoblanmaydi.
Baland poshnali tufli kiyish
Deyarli hamma baland poshnali poyabzallarning zarari haqida biladi va ularni kiyishda davom etmoqda. Baland poshna gavdaning tabiiy shaklini buzadi, mushak va bo‘g‘imlarga qo‘shimcha stress yaratadi, belni ortiqcha zo‘riqtiradi. Bunday vaqtda baland poshnali tuflilardan voz kechish va qulay taglikli poyabzalga o‘tish kerak. Shuningdek, orqa qismi ochiq poyabzallar ham zararli bo‘lib, ularda harakatlanish umurtqa pog‘onasiga salbiy ta’sir o‘tkazadi. Bu esa o‘z-o‘zidan bel sohasida og‘riqlarga sabab bo‘ladi.
Noto‘g‘ri ovqatlanish
Ajablanarlisi shundaki, ovqatlanish ham to‘g‘ridan to‘g‘ri bel salomatligi bilan bog‘liq. 2014-yilda Asian Spine Journal jurnalida chop etilgan tadqiqot shuni ko‘rsatdiki, bel og‘rig‘idan shikoyat qiladigan har uchinchi ayol va har to‘rtinchi erkak oshqozon-ichak trakti bilan ham muammolarga duch kelgan. Yengil uglevodlar va shakarga boy ratsion, sabzavot va dukkakli ekinlarning yetishmasligi organizmda — bel sohasida yallig‘lanish jarayonlarining rivojlanishiga sabab bo‘ladi.
Chekish
Kashandalar diqqatiga: doimiy chekish orqa miya disklarini qon bilan ta’minlanishini buzadi, bu esa ularning erta qarishi va yo‘q qilinishiga olib keladi. Chekilgan har bir sigaret tom ma’noda umurtqa pog‘onasiga ta’sir o‘tkazadi va bel sohasida muammolar paydo bo‘lishiga olib keladi.
Izoh (0)