Och qoringa iliq suv ichish foydalimi yoki zararlimi? Mutaxassis javob beradi
Vazn yo‘qotish va organizmni tozalashga yordam beradigan mahsulotlarni izlab tez-tez dorixonalarga murojaat qilamiz yoki ijtimoiy tarmoqlarda samaradorligi isbotlanmagan qimmatbaho mahsulotlarga buyurtma beramiz. Biroq bunday vosita, ya’ni issiq suv har bir oshxonada mavjud. Wday nashri och qoringa issiq suv ichish inson organizmiga qanday ta’sir ko‘rsatishi haqida ma’lumot berdi.
Ertalab och qoringa issiq suv ichishning foydali jihatlari
Ma’lum bo‘lishicha, ertalab och qoringa bir stakan issiq suv ichish organizmga yaxshi ta’sir qiladi, u:
- ichak va oshqozonni toksinlardan tozalaydi;
- zaiflashtiruvchi parhezlarsiz vazn yo‘qotishga yordam beradi;
- qon bosimini normallashtiradi;
- husnbuzar va yog‘li teridan xalos bo‘lishni ta’minlaydi.
Eng foydali xususiyatlar issiq, biroq qaynatilmagan suvda mavjud. Suvni qaynatganda foydali xususiyatlar yo‘qoladi, bunday mahsulot tanada to‘liq so‘rilmaydi. Biroq katta shaharlarda oddiy ichimlik suvi eng yaxshi sifatga ega emas, ba’zida uni xom holda ichish sog‘liq uchun xavfli hisoblanadi. Bunday holatda zamonaviy filtrlangan yoki sotib olinadigan ichimlik suvidan foydalanishingiz mumkin.
Ertalab och qoringa issiq suvni qanday ichish kerak?
Organizmni tozalash va vazn yo‘qotish uchun har kuni bir stakan issiq, biroq qaynatilmagan suv ichish tavsiya etiladi. Tavsiya etilgan harorat 40 darajani tashkil etadi. Suvni uyg‘ongandan so‘ng darhol, har doim och qoringa shoshilmasdan, kichik qultumlarda ichish kerak.
Ta’mni yaxshilash uchun suvga ozgina asal yoki bir tilim limon (bir necha tomchi sharbati) qo‘shishingiz mumkin.
Shu bilan birga, limonli suvni ichish tavsiya etilmaydigan holatlar ham mavjud: u oshqozonning kislotaliligi oshgan insonlarga tavsiya etilmaydi. Shuningdek, surunkali va o‘tkir gastrit yoki oshqozon yarasi ham bor insonlar limonli suvni iste’mol qilmasligi kerak.
Ekspert fikri
“Och qoringa suv ichish yoki ichmaslikni har kim o‘zining ovqatlanish afzalliklariga qarab qaror qiladi. Biroq, issiq suvni ichmoqchi bo‘lsangiz, uni xona haroratida yoki maksimal tana haroratida iste’mol qilgan ma’qul. Bu holatda tana haroratni tenglashtirish va ichki gomeostazni saqlab qolish uchun energiya sarflamaydi. Juda sovuq yoki issiq suv oshqozon shilliq qavatini bezovta qilishi mumkin va u kamroq fiziologik xususiyatga ega bo‘ladi.
Ma’lumki, limon S vitaminiga boy. Limon issiq suv yoki choyga solinsa o‘zining foydali xususiyatini, ya’ni S vitaminini yo‘qotadi.
Vazn yo‘qotish uchun issiq limonli suv ichish ham shart emas. Men bu vazn yo‘qotishga yordam beradigan yoki metabolizmni tezlashtiradigan, oshqozon-ichak traktining funksiyalarini yaxshilaydigan ishonchli tasdiqlaydigan tadqiqotlarni ko‘rmadim. Bizning organizmimiz o‘z-o‘zini tartibga soluvchi tizim bo‘lib, kerakli fermentlar, mikroelementlar kontsentratsiyasini nazorat qiladi va biror narsaning ortiqcha qo‘shilishi yoki suyultirish avtoregulyatsiya jarayonlarining buzilishiga olib keladi.
Bundan tashqari, limon tarkibida safro sekretsiyasini rag‘batlantiradigan organik kislotalar mavjud. Gastrit, oshqozon yoki o‘n ikki barmoqli ichakning oshqozon yarasi, xoletsistit bilan og‘rigan insonlarga och qoringa issiq limonli suv tavsiya etilmaydi. Bunday holatda, shifokor bilan maslahatlashish kerak.
Shu bilan birga, limon iste’mol qilishni cheklash ham kerak emas, biroq men S vitaminini qizil qalampir, qorag‘at va unga boy bo‘lgan boshqa oziq-ovqatlardan ham olishni maslahat beraman. Suyuqliklarni qabul qilish atrof-muhit harorati va sport mashg‘ulotlariga qarab kun davomida teng ravishda taqsimlanishi kerak”, — deydi diyetolog Yelena Ryabinkova.
Mavzuga doir:
- Kuniga 8 stakan suv ichish tashqi ko‘rinishga qanday ta’sir ko‘rsatadi?
- Kunni bir stakan limonli suv ichishdan boshlashning foydali tomonlari.
