“Bu viloyatlar hokimi, prokurori, ichki ishlar idoralari nima bilan band?” Prezident energiya resurslaridagi o‘g‘riliklarga to‘xtaldi

Shavkat Mirziyoyev raisligida tadbirkorlik va sanoatni rivojlantirish, aholi bandligini ta’minlash chora-tadbirlari yuzasidan videoselektor yig‘ilishi boshlangani haqida xabar berilgandi. Yig‘ilishda bugungi og‘ir vaziyatda elektr va tabiiy gaz tarmoqlariga noqonuniy ulanishlar, o‘g‘riliklar davom etayotgani, bunga joylardagi rahbarlar befarq va sherik bo‘layotganiga chidab bo‘lmasligi qayd etildi.

Ta’kidlanishicha, dekabr oyi boshidan qariyb 3 mingta, so‘nggi ikki kunda esa 1,5 mingta bunday holat aniqlandi. Ular, ayniqsa, Farg‘ona (617 ta), Andijon (325 ta), Samarqand (252 ta), Namangan (220 ta), Sirdaryo (218 ta), Toshkent shahrida (269 ta) ko‘p.

Misol uchun, elektrdan 8 million kilovatt o‘g‘irlangan, bu kuz-qish mavsumida 41 ming hovli uylarning bir oylik iste’moliga teng. Shu bilan birga, 11,5 million kub metr yoki 19 ming xonadonning bir oylik iste’moliga teng tabiiy gaz noqonuniy ishlatilgani aniqlandi.

O‘tgan hafta Namanganda 110 tonna, Qoraqalpog‘istonda 22 tonna aholiga berilishi kerak bo‘lgan ko‘mir noqonuniy ravishda sotib yuborilgan.

“Bu viloyatlar hokimi, prokurori, ichki ishlar idoralari nima bilan band?” — deb savol qo‘ydi Prezident. Viloyat hokimlari qozonxona, gaz va ko‘mir tarqatish shoxobchalari, avtopark, elektr tarmoqlariga borib, ishlarni ko‘zi bilan ko‘rmagani, bu ishlarni tashlab qo‘ygani keskin tanqid qilindi.

Mavzuga doir:

• “Ular qishga tayyorgarlikni barbod qildi, shuncha qilayotgan islohotlarimizni obro‘sizlantirdi” — Mirziyoyev rahbarlar haqida
• Gaz va elektr muammosi bo‘yicha qonunbuzilishiga yo‘l qo‘ygan ayrim rahbarlar qamoqqa olingan
•  “Hududgazta’minot”ning Toshkent viloyati filiali direktori qamoqqa olindi