Jahon banki vitse-prezidenti Anna Byerde 2022-yil oxiriga kelib, Ukrainada qashshoqlikda yashayotganlar soni 8 millionga yetishini ma’lum qildi. Uning fikricha, Ukrainani tiklash uchun kamida 500 milliard yevro kerak bo‘ladi.
Byerde xonim “ushbu urushning insonparvarlik oqibatlari halokatli” ekanligini ta’kidladi.
2022-yil oxirigacha Ukrainada 8 million kishi qashshoqlikda yashaydi. Shunday qilib, qashshoqlik darajasi aholining ikki foizdan 25 foizigacha oshadi, — dedi u Avstriyaning Presse gazetasiga bergan intervyusida.
Uning ta’kidlashicha, bu mamlakat aholisining daromadlari va turmush darajasiga salbiy ta’sir qilmoqda.
Oktabr oyida Anna Byerde, bank hisob-kitoblariga ko‘ra, Ukraina iqtisodiyoti joriy yilda 35 foizga pasayishini aytgandi.
Jahon banki rahbari Devid Malpasga ko‘ra, Ukrainani tiklash xarajatlari 350 milliard dollardan oshishi kutilmoqda. Bank hozirgacha Ukrainaga 18 milliard dollar ajratgan.
Avvalroq Jahon banki Ukrainaga davlat xizmatchilarining maoshi uchun 60 million dollar o‘tkazgani haqida xabar berilgan edi.
Izoh (0)