AQSHning Chancellorsville raketa kreyseri Janubiy-Xitoy dengizidagi Nansha (Spratli) orollariga yaqin suv hududga bostirib kirdi, deya ma’lum qildi Xitoy xalq ozodlik armiyasining janubiy jangovar qo‘mondonligi matbuot kotibi Tyan Szyunli. Xitoy harbiylari Amerika kreyserini kuzatib borgan, shundan so‘ng u Nansha orollari yaqinidagi suvlarni tark etgan.
Szyunli ushbu hodisa aynan qachon sodir bo‘lganiga aniqlik kiritmadi.
“AQSH harbiylarining harakatlari Xitoy suvereniteti va xavfsizligini jiddiy ravishda buzdi, bu AQSHning navigatsiya gegemonligi va Janubiy-Xitoy dengizini harbiylashtirish istagining yana bir inkor etib bo‘lmas isboti”, — dedi u.
O‘z navbatida, AQSH yettinchi floti Chancellorsville kreyseri Xitoy suvlariga noqonuniy kirgani haqidagi ayblovlarni yolg‘on deb atadi.
Xitoy va AQSH o‘rtasidagi munosabatlar AQSH Kongressi spikeri Nensi Pelosi 2-avgust kuni Tayvanga tashrif buyurganidan so‘ng keskinlashdi. Pekin Tayvanni o‘z hududi deb biladi va unga har qanday alohida rasmiy tashriflarni qoralaydi. Noyabr oyida Xitoy rahbari Si Szinpin AQSH prezidenti Jo Bayden bilan uchrashib, Tayvan masalasi ikki davlat munosabatlaridagi qizil chiziq ekani haqida ogohlantirgan. XXR Mudofaa vazirligi Xitoy armiyasining mamlakat birligini himoya qilishga tayyorligi haqida gapirgan.
Izoh (0)