2022-yilning yanvar—oktabr oylarida O‘zbekiston 51 ta xorijiy davlatga qiymati 216,6 mln dollarga teng bo‘lgan 245,2 ming tonna uzum eksport qilgan. Bu haqda Davlat statistika qo‘mitasi xabar bermoqda.
Uzum eksporti o‘tgan yilning mos davri bilan solishtirilganda 41,6 ming tonnaga oshgan. Biroq asosan Rossiyaga yetkazib berilmoqda.
O‘tgan 10 oy mobaynida O‘zbekiston Rossiyaga 140 ming tonna uzum eksport qilgan. 2021-yilning mos davrida bu ko‘rsatkich 88 ming tonnaga teng bo‘lgan edi.
Yil boshidan beri Qozog‘istonga 48,8 ming tonna O‘zbekiston uzumlari yetkazib berilgan va bu davlat ikkinchi pog‘onada. Bu o‘tgan yilning mos davriga nisbatan 14,2 ming tonnaga kamaygan.
Yanvar—oktabr oylarida Qirg‘iziston (23 ming tonnadan 16,7 ming tonnaga) va Xitoyga (9 ming tonnadan 7,3 ming tonnaga) uzum yetkazib berish ham 2021-yilning mos davri bilan solishtirilganda kamaygan.
Qaysi hudud xorijga eng ko‘p uzum eksport qilgan?
- Farg‘ona viloyati — 67,7 ming tonna;
- Samarqand viloyati — 46,4 ming tonna;
- Toshkent viloyati — 30,8 ming tonna;
- Surxondaryo viloyati — 22 ming tonna;
- Xorazm viloyati — 17,2 ming tonna;
- Namangan viloyati — 15,2 ming tonna;
- Qashqadaryo viloyati — 14,8 ming tonna;
- Toshkent shahri — 13 ming tonna;
- Andijon viloyati — 6,8 ming tonna;
- Buxoro viloyati — 4,1 ming tonna;
- Jizzax viloyati — 2,8 ming tonna;
- Navoiy viloyati — 1,5 ming tonna;
- Sirdaryo viloyati — 1,5 ming tonna;
- Qoraqalpog‘iston — 1,1 ming tonna.
Avvalroq O‘zbekistonda uzum urug‘idan yog‘ ishlab chiqarish yo‘lga qo‘yilgani haqida xabar berilgan edi.
Izoh (0)