Toshkent viloyatida IIBB tomonidan hamkorlikdagi tashkilotlar bilan “Zarbdor” maxsus tezkor-profilaktika oyligi o‘tkazilmoqda. Jumladan, tadbirning o‘tgan davri mobaynida giyohvandlik yo‘nalishi bo‘yicha jami 135 ta jinoyat fosh etilib, natijada 100 ga yaqin shaxs ushlangan va ulardan 70 kilogramm 551 gramm giyohvandlik vositasi olingan.
Yil boshidan esa giyohvandlikka chek qo‘yish borasida 1 186 holat fosh etilib, mingdan ortiq shaxs javobgarlikka tortildi. Ular va ularning yashash xonadonlaridan jami 310 kilogramm turli xil va ko‘rinishdagi giyohvandlik vositalari aniqlanib, muomalaga kiritilishining oldi olingan.
Xususan, “Zarbdor”oyligi doirasida 14-noyabr kuni Piskent tumani IIB xodimlari tomonidan “Bahor” bog‘dorchilik-uzumchilik shirkati 6-ko‘chasida yashovchi fuqaroning yashash xonadoni xolislar ishtirokida ko‘zdan kechirilgan.
Tadbirda xonadonga quritish maqsadida saqlanayotgan, vazni 17 kilogramm 250 gramm bo‘lgan marixuana giyohvandlik moddasi borligi aniqlanib, daliliy ashyo sifatida hujjatlashtirilib olindi. Hozirda mazkur holat va boshqalari yuzasidan tezkor surishtiruv ishlari olib borilmoqda.
Izoh (0)