“Bizda barcha dushmanlarimizni jahannamga yuborish imkoniyati bor, lekin bu bizning vazifamiz emas”. Medvedev yangi post e’lon qildi

Rossiya Xavfsizlik kengashi raisi o‘rinbosari, mamlakat sobiq prezidenti va bosh vaziri Dmitriy Medvedev o‘z Telegram-kanalida navbatdagi postini yozdi. Unda Rossiyaga yangi hududlar kerak emasligini, biroq u o‘zining muqaddas yerlarini hech kimga berib qo‘ymasligini qayd etgan.

Shuningdek, Medvedevning fikricha, Rossiyaga qarshi “o‘lib borayotgan” dunyo kurashmoqda, u esa “aqldan ozgan narkoman natsistlar, ularga uchgan va ulardan qo‘rqqan xalq hamda G‘arb itxonasidan hurkovich itlar galasi”dan iborat.

Bundan tashqari, sobiq bosh vazir Rossiyadan voz kechgan sobiq sheriklar va mamlakatni tark etgan fuqarolarga nisbatan haqoratli iboralardan foydalangan. “Bizdan ba’zi qo‘rqib qolgan sheriklarimiz voz kechdi — ularga tupuramiz. Demak ular bizga do‘st bo‘lmagan, shunchaki tasodifiy hamrohlar bo‘lgan… Qo‘rqoq sotqinlar va ochko‘z qochoqlar dunyoning narigi chekkasiga tuyog‘ini shiqillatdi — ularning suyaklari begona yurtlarda chirisin…”, — deyiladi postda.

“Bizda barcha dushmanlarimizni olovli jahannamga yuborish imkoniyati bor, lekin bu bizning vazifamiz emas”, — deya o‘z postini yakunlagan Medvedev.

Avvalroq Rossiya tarkibidagi Boshqirdiston respublikasi poytaxti Ufa shahrida to‘rt nafar talaba terakt tashkillashtirishda ayblanib, hibsga olinganidan keyin, Rossiya Xavfsizlik kengashi raisi o‘rinbosari, mamlakat sobiq prezidenti va bosh vaziri Dmitriy Medvedev bunga munosabat bildirgan edi. U ayblanuvchilarni “chet ellik talabalar” va “yaramaslar” deb atadi, shuningdek, Ikkinchi jahon urushi davrida “sabotajchilar” (putur yetkazuvchilar, to‘sqinlik qiluvchilar) otib tashlanganini eslatdi.

“Zamonaviy Rossiyada o‘lim jazosiga moratoriy (taqiq) amal qiladi. Bu g‘oyatda insonparvarlik… Lekin, yana bir marta ta’kidlayman, hozirgi Konstitutsiya doirasida ham, Rossiya Konstitutsiyaviy sudi huquqiy pozitsiyasini o‘zgartirishda zarur bo‘lsa, o‘lim jazosiga nisbatan moratoriy yengib o‘tilishi mumkin. Bu odamlarimiz, davlat va jamiyat manfaatlarini himoya qilish vositasini tanlash masalasidir”, — deyiladi Medvedevning postida.

Medvedev avgust boshida “VKontakte”dagi sahifasida post qoldirib, Qozog‘istonni ruslarga nisbatan genotsidda ayblagan va SSSR qayta tiklanishini ma’lum qilgan edi. Keyinroq uning yordamchisi Oleg Osipov Medvedevning “VKontakte” ijtimoiy tarmog‘idagi sahifasi xakerlar hujumiga uchragani haqida xabar berdi.