“Choliqushi” serialidagi Feride obrazi orqali dunyoga tanilgan aktrisa, model Aydan Shener umrining ko‘p qismini kino olamga bag‘ishladi. “Lisa.ru” nashri aktrisa mashhurlikka erishmasidan oldin qanday hayot kechirgani va “Choliqushi” serialida suratga tushganidan keyingi hayoti haqida ma’lumot berdi.
Shon-sharaf yo‘lida
Aydan 1963-yilning mart oyida Turkiyaning Kilis shahrida kambag‘al, biroq ijodkor oilada tug‘ilgan: uning otasi musiqani yaxshi ko‘rgan va musiqashunos bo‘lgan. Aktrisaning ajdodlari Qozonda yashagan, biroq ular nasroniylikni qabul qilishni istamagani uchun Turkiyaga ko‘chib o‘tgan. Shuning uchun Shenerda nafaqat turkiy, balki tatarlarning ham qoni bor.
Aktrisa 18 yoshida “Turkiya go‘zali” tanlovida g‘oliblikni qo‘lga kiritgan. Bu tanlovda ishtirok etganidan bir yil o‘tib Aydan “Dunyo go‘zali” tanloviga boradi, biroq birinchi o‘rinni venesuelalik go‘zalga boy beradi.
Shener reklama roliklarida rol o‘ynadi, moda jurnallarining muqovalarida suratga tusha boshladi va ota-onasi qizining barcha urinishlarini qo‘llab-quvvatladi. Oradan ko‘p o‘tmay turk kino ijodkorlari ham yosh va go‘zal qizga e’tibor qaratdi.
Aktrisa 1983-yilda “Kichkina xo‘jayin” serialida bosh rolni ijro etdi. Biroq aktrisaning yulduzlik vaqtlari bu filmda suratga tushgandan uch yil o‘tib keldi — u 1986-yilda “Choliqushi” serialida suratga tushdi. Sujetga ko‘ra, uning qahramoni Feride amakisi va xolasining qo‘lida tarbiyalangan yetim farzand. Zo‘ravon va quvnoq xulq-atvori uchun qizga “choliqushi” laqabini berishadi.
Feride xolasining o‘g‘li Kamronni juda yaxshi ko‘radi, ammo buni tan olishdan qo‘rqadi. Bir-biriga ko‘ngil qo‘ygan juftlik turmush qurmoqchi bo‘ladi. Biroq qahramon sevgilisi uni aldaganini bilib qoladi va boshqa shaharga qochib ketadi. Feride u yerga borib qizlar o‘qitiladigan maktabda dars beradi. Biroq u sevgilisi Kamron bilan yangi uchrashuvdan qochib qutila olmaydi. Aytgancha, Shener o‘z qahramoniga juda o‘xshashligini aytgan. Axir, u ham ayollar, ayniqsa, musulmon ayollarning haq-huquqlari, adolat uchun kurashgan.
“Men musulmonman, Yaratguvchiga ishonaman, Alloh bilan aloqam borligini his qilaman. Biroq men ro‘mol va ayniqsa paranji o‘rashda hech qanaqa ma’no ko‘rmaganman. Agar Alloh menga go‘zallik bergan bo‘lsa, nega uni yashirishim kerak? Men tenglik tarafdoriman. Zamonaviy Turkiyada qizlarning ta’lim olishini taqiqlash kerak, deb bahslashishda davom etish men uchun vahshiylik. O‘ylaymanki, agar remeykni emas, “Choliqushi” filmining davomini suratga olishganida, qahramonim Feride bilim olishga intilgan qizlarning huquqlarini himoya qilgan bo‘lardi”, — deydi aktrisa.
Aktrisaning serialdan keyingi hayoti
Bir nechta muvaffaqiyatli loyihalardan so‘ng, ko‘plab rejissorlar Aydan bilan hamkorlik qilish istagini bildirdi. Aktrisa boshqa “Choliqushi” serialida ijro etgan obrazidek rol olmadi. Tomoshabinlar uni “Somon yo‘li”, “Istanbulning ikki yuzi” va boshqa seriallarda ko‘rishlari mumkin.
Aytgancha, Aydan 2004-yilda otasi bilan birga Qozonga, ota-bobolarining vataniga tashrif buyurgan va 2007-yilda yana bir bor III Xalqaro musulmon filmlari “Oltin minbar” festivalining yopilishida ishtirok etish uchun borgan.
Shener 1983-yilda futbolchi Ayxan Akbinga turmushga chiqqan. Oradan besh yil o‘tib juftlikning Eje ismli qizi tug‘ilgan. Biroq ular oradan ko‘p o‘tmay ajrashdi, chunki Aydanning turmush o‘rtog‘i u bilan ko‘p vaqtini ishga ajratgani sababli kelisha olmadi.
Ayxan rafiqasining uyda o‘tirishini, har tomonlama unga bo‘ysunishini, shuningdek, u ko‘plab muxlislaridan rashk qilgani uchun turmush o‘rtog‘ining paranji o‘rashini xohlar edi. Erkinlikni sevuvchi aktrisa sakkiz yil davomida bu munosabatga chidadi va keyin ajrashishga qaror qildi.
Aydan Shener ikkinchi marta turmushga qurmadi. Aktrisa bugungi kunda filmlarda kam rol o‘ynaydi: u qizi bilan ko‘proq vaqt o‘tkazishga harakat qiladi va hayvonlarga yordam beradi.
Mavzuga doir:
- Qamoq va muvaffaqiyatsiz shaxsiy hayot: “Choliqushi” seriali qahramonlarining taqdiri qanday kechdi? (foto).
- 58 yoshni qarshilagan “Choliqushi” seriali yulduzi Aydan Shener haqida 7 fakt (foto).
- “Choliqushi” seriali yulduzi – Aydan Shener ekranlarga qaytmoqda.
- Uch marta sahnalashtirilgan mashhur asar. Turkiyaning “Choliqushi” seriali haqida qiziqarli faktlar.
Izoh (0)