Turkiya prezidenti Rajab Toyyib Erdo‘g‘on Rossiya prezidenti Vladimir Putin bilan Donetsk va Lugansk xalq respublikalari hamda Ukrainaning Zaporojye va Xerson viloyatlarida bo‘lib o‘tgan referendumlarni muhokama qilmoqchi. Erdo‘g‘onning aytishicha, muzokaralar bugun, 29-sentabr kuni o‘tkazilishi mumkin, deb xabar bermoqda CNN Turk.
“To‘rtta shahardagi referendumlar muammolar keltirib chiqarmoqda. Bunday referendumlar bo‘lmaganida edi barchasini diplomatiya yo‘li bilan hal qilsak bo‘lardi. 2014-yilda Qrimda ham xuddi shunday holat kuzatilgan. O‘shanda muvaffaqiyatga erisha olmaganmiz”, — dedi Erdo‘g‘on telekanal efirida.
Turkiya rahbari Rossiya va Ukraina o‘rtasidagi harbiy mojaroda yadro qurolini qo‘llash falokat bo‘lishini qo‘shimcha qildi.
Referendumlar
LXR, DXR, Xerson va Zaporojyening Rossiya tarkibiga kirishi bo‘yicha referendumlarda ovoz berish 27-sentabr kuni yakunlandi. 28-sentabr kuni ertalab Donbass saylov komissiyalari ovozlarning 100 foizi ko‘rib chiqilganidan keyin referendumlar natijalarini e’lon qildi. Ularning aytishicha, LXR saylovchilarining 98,42 foizi, DXR elektoratining 99,23 foizi, Zaporojye va Xerson viloyatlari bosib olingan hududlari aholisining esa tegishli ravishda 93,1 foizi va 87,05 foizi Rossiya tarkibiga qo‘shilishni yoqlab ovoz bergan.Referendumlar boshlanishidan oldinoq Putin Rossiya Donbass, shuningdek, ikki viloyat fuqarolarining yakuniy qarorini qo‘llab-quvvatlashini aytgandi.
AQSH va Yevroittifoq esa referendum natijalarini tan olmasligini ma’lum qilgan va u o‘tkazilgan taqdirda, Rossiyaga qarshi yangi sanksiyalar kiritish bilan tahdid qilgandi. Shuningdek, Serbiya va Turkiya ham ovoz berish yakunlarini tan olmasligini bildirgan.
Rasman tasdiqlanmagan ma’lumotlarga ko‘ra, Rossiya prezidenti Vladimir Putin LXDR, DXR hamda Xerson va Zaporojye viloyatlarining bosib olingan hududlari RF tarkibiga qo‘shilganini 30-sentabr kuni e’lon qilishi mumkin.
Izoh (0)