O‘zbekiston banklari yil boshidan beri qancha foyda ko‘rgani ma’lum bo‘ldi

O‘zbekiston banklari tomonidan joriy yilning yanvar—avgust oylari davomida 47,7 trln so‘mlik daromad olingan. Bu haqda Markaziy bank xabar bermoqda.

Bunda foizsiz daromadlar 6,6 trln so‘mni, foizli daromadlar esa 41,1 trln so‘mni tashkil qilgan. Banklarning foizsiz daromadlari o‘tgan yilga nisbatan 3,1 trln so‘mga ko‘paygan. Foizli daromadlar bilan bu ko‘rsatkich qariyb 11 trln so‘mga yetgan.

Yil boshidan beri O‘zbekistondagi banklar 1,94 trln so‘m foyda solig‘ini to‘lagan. Bu o‘tgan yilga nisbatan 840 mlrd so‘mga ko‘p.

Banklar joriy yilda 6,1 trln so‘m sof foyda ko‘rgan. Ular tomonidan Iyul va avgust oylarining o‘zida 1,1 trln so‘mlik sof foydaga erishilgan. 

Yanvar—avgust oylariga ko‘ra sof foyda miqdori o‘tgan yilning mos davriga nisbatan 2,2 trln so‘mga ko‘paygan.

Avvalroq Forbes O‘zbekistondagi 10 ta eng ishonchli bankni e’lon qilgan edi.