Yevropa gaz omborlari hozirda o‘rtacha 85 foizdan ko‘proq to‘ldirilgan. Bu haqda “Kommersant” xabar bermoqda.
Yevropa Ittifoqining 18 ta davlatidan 14 tasi 1-noyabrga qadar erishilishi kerak bo‘lgan 80 foiz maqsaddan allaqachon o‘tib ketgan.
Shu bilan birga, sentabr oyida Rossiya gazining umumiy importdagi ulushi 10 foizgacha pasaygan.
Joriy yil oxirigacha gazga bo‘lgan talabni qondirish uchun Yevropa davlatlari Rossiyadan gaz yetkazib berishni saqlab qolishi yoki gaz iste’molini qo‘shimcha 7-12 milliard kub metrga kamaytirishi kerak.
2022-yilda Yevropada gazga bo‘lgan talab 470 milliard kub metrni tashkil qiladi. Mintaqa mamlakatlari tomonidan kelgusi qish mavsumida gazning taxminiy iste’moli esa 300 milliard kub metr bo‘lishi kutilmoqda.
Import orqali 194 milliard kub metr, saqlangan zaxiralar orqali 75 milliard kub metr gaz bilan ta’minlansa, hozirgi sur’atda tejamkorlik 19 milliard kub metrga yetishi mumkin. Shunday qilib, gaz taqchilligi 12 milliard kub metrni tashkil etadi.
Hatto hozirgi tejalayotgan gaz darajasi saqlanib qolsa ham, 2023-yilda Rossiya gazidan voz kechish Yevropa davlatlari uchun 40-60 milliard kub metr defitsitni bildiradi.
Bu Fransiya va Polshaning yillik gaz iste’moli bilan yoki o‘g‘itlar ishlab chiqarish, neft-kimyo, qora va rangli metallurgiya, mashinasozlik kabi tarmoqlarning yillik iste’moli bilan deyarli teng.
Hozir Yevropada azotli o‘g‘itlar ishlab chiqarish quvvatining 70 foizi to‘xtatildi, alyuminiy ishlab chiqarish 25 foizga, po‘lat ishlab chiqarish 5 foizga qisqardi. Taxminlarga ko‘ra, bu jarayonlar davom etishi ham mumkin.
Avvalroq Yevropada gaz narxi bir kunda 6,5 foizga arzonlashgani haqida xabar berilgandi.
Izoh (0)