Nishon tumani hokimining birinchi o‘rinbosari Erkin Boboqulov o‘ziga biriktirilgan xizmat avtomobilida YTH sodir etib, 49 yoshli fuqaroning o‘limiga sababchi bo‘ldi. Bu haqda Qarshi tumani IIB boshlig‘i N.Ovlayev xabar berdi.
Qarshi tumani IIB rahbarining viloyat IIB boshlig‘iga yozgan axborotida voqea 2022-yilning 30-iyul kuni soat tungi 23:50 da sodir bo‘lgani aytilgan.
“Nishon tumani hokimining birinchi o‘rinbosari Erkin Boboqulov boshqaruvchidagi Gentra rusumli davlat raqami 70 040 DAV bo‘lgan xizmat avtomobilida Qarshi shahar katta halqa yo‘li bo‘ylab harakatlanib borib, Qarshi tumanidagi ‘Taxtapul’ mahallasi hududida o‘ziga notanish bo‘lgan fuqaroni urib yuboradi. Natijada Respublika shoshilinch tez tibbiy yordam bo‘limi Qarshi shahar filialiga noma’lum murdani olib borgan”, — deyiladi mas’ulning viloyat IIB boshlig‘iga yozgan ma’lumotnomasida.
Murdaning shaxsiga aniqlik kiritilganda u 1973-yilda tug‘ilgan Y.A. ekani ma’lum bo‘lgan.
“Daryo” Nishon tumani hokimligi axborot xizmati bilan bog‘lanib, hokim o‘rinbosarining fikri haqida qiziqdi.
Hokimlik axborot xizmati rahbarining ma’lumot berishicha, mas’ul ijtimoiy tarmoqlarda tarqalgan xabarni rad etmagan. Tasdiqlamagan ham.
Viloyat IIB axborot xizmati “Daryo”ning bu haqdagi so‘roviga javoban holat haqida tez orada batafsil ma’lumot berilishini bildirdi.
Izoh (0)