Toshkent shahri Chilonzor tumanida katta daraxtlarning ildiziga shikast yetkazilgani yuzasidan jinoyat ishi qo‘zg‘atilgandi. Davlat ekologiya qo‘mitasi raisi Nazrullo Oblomurodov voqea joyiga borib, holat bilan yaqindan tanishdi.
Qo‘mita matbuot xizmatining ma’lum qilishicha, Chilonzor ko‘chasida daraxtlarga shikast yetkazilganligi holati yuzasidan Davlat ekologiya qo‘mitasi mas’ullari ishtirokida ishchi guruh tuzilib, tuzilgan ishchi guruh a’zolari tomonidan hududdagi barcha daraxtlar doimiy nazoratga olindi. Zararlangan daraxtlarni saqlab qolish va kelgusida bunday holatlar takrorlanmasligi uchun mutasaddilarga tegishli topshiriqlar berdi.
Eslatib o‘tamiz, 6-avgust kuni Chilonzor shohko‘chasidagi qurilish hududida 7 ta eman daraxtining tomir qismi ochilishi oqibatida shikast yetkazilgani hamda daraxtlar xavf ostida qolgani aniqlangandi.
Mutaxassislarning ma’lumotiga ko‘ra, ushbu holatda zudlik bilan choralar ko‘rilmagan taqdirda shikast yetkazilgan daraxtlar qurishi oqibatida tabiat va atrof muhitga 348,9 million so‘m zarar yetkazilishiga olib kelishi mumkinligi ko‘rsatilgan.
Shu kuni voqea joyiga shahar hokimi Jahongir Ortiqxo‘jayev yetib bordi va mas’ullarga loyihadagi olti chiziqli avtomobil yo‘li o‘rniga to‘rt chiziqli avtomobil yo‘lini qoldirish, ortib qolgan joyni esa yashil hududga aylantirish topshiriq berdi. Jahongir Ortiqxo‘jayev shahar prokuroriga ushbu loyihada qo‘yilgan xatoliklar uchun loyiha institutiti, quruvchilar, ekologiya bo‘limi va, umuman, ushbu loyihada qatnashgan barcha mutasaddilarga chora ko‘rilishi zarurligini ta’kidladi.
Chilonzor tumani hokimligi matbuot xizmatining ma’lum qilishicha, muammoni joyiga chiqib o‘rgangan Fanlar akademiyasi huzuridagi Botanika instituti mutaxassislari daraxtlarni asrab qolish uchun yo‘lning har ikkala tomonining 3,5 metr qismini gomusli tuproq bilan to‘ldirish, daraxtlarga chirishning oldini olishda ishlatiladigan fitosporin mikrobiologik preparatlari va ildiz o‘stiruvchi kornevin biostimulyatori bilan ishlov berish haqida tavsiyalar berdi.
Shu tavsiyalar asosida “O‘zyo‘lko‘kalamzorlashtirish” unitar korxonasi mutaxassislari tomonidan daraxtlarni parvarishlash ishlari boshlab yuborildi. Shuningdek, 140 metr kub sof sariq tuproq, 45 metr kub gumus va 33 metr kub qum olib kelindi va yo‘lning har ikki tomonidan daraxtlar uchun ajratilgan 3,5 metrli yer maydoniga mutaxassis tavsiyasiga asosan solinmoqda. Ildizlari zararlangan eman daraxtlari esa yetkazib kelingan biostimulyator va preparatlar bilan parvarishlanmoqda.
Mazkur holat yuzasidan Jinoyat kodeksining 198-moddasi 3-qismi (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) bilan jinoyat ishi qo‘zg‘atilib, tergov harakatlari olib borilmoqda.
Izoh (0)