Samarqandda noqonuniy o‘qotar qurol sotayotgan 55 yoshli erkak ushlandi

Samarqand viloyati Paxtachi tumanida o‘q otar qurolni sotayotgan shaxs ushlandi. Bu haqda viloyat Ichki ishlar boshqarmasi xabar qildi.

Qayd etilishicha, IIB xodimlari tomonidan olingan tezkor ma’lumotga asosan 6-iyul kuni tezkor tadbir o‘tkazilgan. Tadbir davomida muqaddam Jinoyat kodeksining 104-moddasi (qasddan badanga og‘ir shikast yetkazish) bilan sudlangan, Paxtachi tumani “Yangiobod” MFYda yashovchi A.S. (1965-yilda tug‘ilgan) 6 million so‘m evaziga o‘zining IJ-17 rusumli ov miltig‘ini noqonuniy ravishda sotayotganda ushlanib, tegishli tartibda hujjatlashtirilgan.

Holat yuzasidan Jinoyat kodeksining 248-moddasi (o‘qotar qurolning, o‘q-dorilarning, o‘qotar qurol asosiy qismlarining, portlovchi moddalarning, portlatish vositalarining yoki portlatish qurilmalarining qonunga xilof muomalasi) 3-qismi bilan jinoyat ishi qo‘zg‘atilib, dastlabki tergov harakatlari olib borilmoqda.