Angliya terma jamoasi qariyb 100 yillik antirekordni qayd etdi

Angliya terma jamoasi Millatlar Ligasining 4-turi doirasida Vengriyaga 0:4 hisobida imkoniyatni boy berdi.

“Uchsherlar” o‘z maydonida 1928-yildan beri ilk bor yirik hisobda mag‘lub bo‘ldi. O‘shanda inglizlar Shotlandiyaga 1:5 hisobida yutqazib qo‘ygandi. Shu vaqtga qadar Angliya o‘z uyida britaniyalik bo‘lmagan jamoalarga bu qadar yirik hisobda imkoniyatni boy bermagandi.

Angliya joriy mavsum Millatlar Ligasida g‘alaba qozona olmayapti. 1-turda ham Vengriyaga mag‘lub bo‘lgan bo‘lsa, 2 va 3-turda Germaniya va Italiya bilan durang o‘ynadi. To‘plar nisbati — 1:6.

Garet Sauteyt jamoasi guruhda so‘nggi o‘rinni egallab turibdi. Italiya 3-o‘rin, Germaniya 2-o‘rin, Vengriya esa guruh yetakchisi hisoblanadi.