Shimoliy Koreyaning yadroviy sinovlariga butun dunyo javob qaytaradi, dedi AQSH davlat kotibi o‘rinbosari Vendi Sherman Janubiy Koreyaga tashrifi chog‘ida.
“Har qanday yadroviy sinov BMT Xavfsizlik Kengashi rezolyutsiyalarini to‘liq buzish hisoblanadi, bunday sinovdan so‘ng tezkor va qat’iy javob qaytariladi”, — dedi Sherman hamda bu javob nafaqat AQSH balki Janubiy Koreya, Yaponiya va “butun dunyo” tomonidan bo‘lishini ta’kidladi.
Shu bilan birga, Janubiy Koreyaning Yonhap axborot agentligi xabariga ko‘ra, Sherman “AQSHning KXDRga nisbatan dushmanlik niyati yo‘qligini” aytib, respublikani diplomatiya yo‘lidan borishga, shuningdek, “beqarorlik va provokatsion faoliyatni” to‘xtatishga chaqirgan.
Sherman 5-iyun kuni Janubiy Koreyaga keldi, mamlakat uning Osiyoga safarida birinchi bekat bo‘ldi, Davlat departamenti rahbari o‘rinbosari Filippin, Laos va Vyetnamga ham tashrif buyuradi.
6-iyun kuni AQSH va Janubiy Koreya Respublikasi Shimoliy Koreyaning 5-iyunda sakkizta raketa uchirganiga javoban qo‘shma kallaklar bilan sakkizta raketa uchirgan edi. Qo‘shma Shtatlar faqat bitta raketani uchirgan, ammo parvozlarning hammasi Amerikaning ATACMS operativ-taktik raketa tizimidan amalga oshirilgan.
Eslatib o‘tamiz, may oyi oxirida AQSH prezidenti Jo Baydenning Seul va Tokioga tashrifi hamda Quad sammiti (Avstraliya, AQSH, Hindiston va Yaponiya ishtirokidagi xavfsizlik bo‘yicha to‘rt tomonlama muloqot)dan keyin KXDR Yapon dengiziga qarata uchta raketa uchirgan edi. Yaponiya buni Shimoliy Koreya tomonidan ochiq-oydin provokatsiya deb atadi.
Shimoliy Koreya yetakchisi Kim Chen In aprel oyi oxirida harbiylarni “dushman kuchlar” tomonidan ortib borayotgan yadroviy tahdidlarga qarshi profilaktika choralarini ko‘rishga tayyorlanishga chaqirdi. Uning ta’kidlashicha, faqat kuchli harbiy kuch KXDR xavfsizligini kafolatlaydi.
Izoh (0)