Axborot texnologiyalari va kommunikatsiyalarini rivojlantirish vaziri Sherzod Shermatov SAP kompaniyasi vakillari bilan uchrashdi. Bu haqda vazirlik matbuot xizmati xabar berdi.
Jumladan, kompaniya ishtirokida kadrlar malakasini oshirish, sohaga investitsiyalarni jalb qilish, yangi telekommunikatsiya texnologiyalari va xizmatlarini joriy etish masalalariga e’tibor qaratildi.
Bundan tashqari, Sherzod Shermatov kompaniyaga O‘zbekistonda mintaqaviy ofisini ochishni taklif qildi. SAP bunga qanday javob bergani haqida xabar berilmagan.
SAP — 1972-yilda Germaniyada tashkil etilgan, dunyodagi tashkilotlar uchun dasturiy ta’minot ishlab chiqaruvchilardan biri. Kompaniya korxonalarning ichki jarayonlari uchun avtomatlashtirilgan boshqaruv tizimlarini ishlab chiqaradi: buxgalteriya hisobi, savdo, ishlab chiqarish, moliya, xodimlarni, omborlarni boshqarish va hokazo.
Avvalroq O‘zbekiston Cisco’ga o‘z vakolatxonasini ochish va masofaviy xizmatlarni kengaytirishni taklif qilgani haqida xabar berilgan edi.
Izoh (0)