Qoraqalpog‘iston Respublikasining Beruniy tumanida MCHJ mansabdor shaxslari fuqarolarni 670 million so‘mdan ortiq mablag‘ga chuv tushirgani aniqlandi. Bu haqda Bosh prokuratura huzuridagi departament xabar berdi.
Ma’lum qilinishicha, departamentning Beruniy tuman bo‘limi tomonidan fuqarolarning huquq va manfaatlarini himoya qilish yuzasidan tergovga qadar tekshiruv o‘tkazilgan. Tekshiruv davomida “B.X.” MCHJ mansabdor shaxslari hududdagi 27 nafar fuqaroga 670,9 million so‘mlik Afrika laqqasi baliqlarini va ozuqalarini yetkazib berishni va’da qilgani aniqlangan. Ular keyinchalik ushbu baliqlarni o‘stirib sotish orqali fuqarolarga ajratilgan kredit qarzdorligini so‘ndirishni va’da qilib, olib ketgan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Buxoroda jamiyat rahbari 11 kishidan firibgarlik bilan olgan pullarga Spark, Malibu va Captiva sotib olgani aniqlangani, Farg‘onada birga tadbirkorlik qilishlarini aytib, fuqarodan 28 ming dollar olgan ayol ushlangani to‘g‘risida xabar berilgandi.
Mavzuga doir:
Izoh (0)