Toshkentda 27 yoshli shaxs to‘lov infokioskini Nexia’siga ortib, o‘g‘irlab ketdi

Toshkent shahrining Yashnobod tumanida infokioskni o‘g‘irlagan shaxs qo‘lga olindi, deb xabar beradi poytaxt IIBB matbuot xizmati.

Ma’lum qilinishicha, 19-mart kuni soat 20:00 larda noma’lum shaxs UzPaynet MCHJga tegishli 22 million so‘mlik infokioskni o‘g‘irlab ketgan. Ushbu shaxs qurilmani o‘zining Nexia avtomobiliga ortib, kimsasiz joyga olib borgan. U yerda infokioskni ochib, ichidagi 3 million so‘mdan ortiq mablag‘ni o‘zlashtirgan.

Ko‘rilgan chora-tadbirlar natijasida gumonlanuvchi shaxs — 27 yoshli A.M. qo‘lga olingan. Mazkur holat bo‘yicha to‘plangan hujjatlar Yashnobod tumani IIO FMBga yuborilgan.

Avvalroq Farg‘onada 18 yoshli yigit bankomatni buzayotganida qo‘lga tushgani, Andijonda bankomatni buzib, undagi pullarni o‘g‘irlashga uringan shaxs ushlangani, Toshkent viloyatida 145 mln so‘mlik bankomatni o‘g‘irlagan 3 nafar yigit qo‘lga olingani to‘g‘risida xabar berilgandi.