“Nasaf” OChLda, “So‘g‘diyona” OFK Kubogida qaysi jamoalar bilan o‘ynashi ma’lum bo‘ldi

“Nasaf” Osiyo Chempionlar Ligasi pley-off bosqichida “Baniyas”ni mag‘lub etib (2:0), musobaqaning guruh bosqichiga yo‘llanma oldi.

“Nasaf” OChL E guruhidan joy oldi. O‘zbekiston Kubogi sohibi guruhda Qatarning “As-Sadd”, Saudiya Arabistonining “Al-Faysali” va Iordaniyaning “Al-Vihdat” jamoalariga qarshi bahs olib boradi.

Shuningdek, D guruhidan joy olgan “Paxtakor”ning uchinchi raqibi ham ma’lum bo‘ldi. Saudiyaning “At-Tavun” klubi Suriyaning “Al-Jayish”ini yengib, guruh bosqichiga yo‘l oldi. “Paxtakor”ning guruhidan yana “Ad-Duhayl” (Qatar) va “Sepahon” (Eron) kabi jamoalar joy olgan.

Chempionlar Ligasining g‘arbiy mintaqasidagi guruh bosqichi o‘yinlari Saudiya Arabistonida markazlashgan tizimda o‘tkaziladi. “Paxtakor” o‘z uchrashuvlarini Burayda shahrida o‘tkazsa, “Nasaf”ning guruhidagi o‘yinlar Dammam shahrida bo‘lib o‘tadi.

Qarshiliklarning g‘alabasi “So‘g‘diyona”ga OFK Kubogi yo‘llanmasini taqdim etdi. Jizzaxliklar debyut mavsumda E guruhida “Oltin Asr” (Turkmaniston), “SSKA” (Tojikiston) va “Neftchi”ga (Qirg‘iziston) qarshi o‘ynaydi.

OFK Kubogi E guruhidagi o‘yinlar Tojikistonning Dushanbe shahrida 24—30-iyun kunlari o‘tkaziladi.